Bakı-Sumqayıt qatarlarında yaranan problem aradan qaldırıldı

Bu gün səhər saatlarından etibarən Bakıdan Sumqayıta və eləcə də Sumqayıtdan Bakıya hərəkət etməli olan qatarların hərəkətində yaranan problem aradan qaldırılıb.

Bu barədə Oxu.Az-a "Azərbaycan Dəmir Yolları" QSC-dən məlumat verilib.

Qeyd edilib ki, texniki problem qeydə alınan 6601 saylı qatar 1 saat 33 dəqiqədən sonra yola düşüb.

08:22

6601 saylı Bakı-Pirşağı-Sumqayıt qatarı bir saatdan artıqdır ki, Sabunçu sahəsində dayanıb.

Oxu.Az-ın əldə etdiyi məlumata görə, buna yolun kontakt şəbəkəsində yaranan problem səbəb olub.

Hazırda ərazidə problemin aradan qaldırılması istiqamətində işlər görülür.

08:05

Bu gün səhər saatlarından etibarən Bakıdan Sumqayıta və eləcə də Sumqayıtdan Bakıya hərəkət etməli olan qatarların hərəkətində gecikmə müşahidə olunur.

Bu barədə Oxu.Az-a sərnişinlər məlumat veriblər.

Qeyd olunub ki, gecikmənin texniki səbəbdən qaynaqlandığı deyilib.

"Sumqayıtdan Bakıya gələn ADY-yə məxsus qatarların hərəkəti dayandırılıb. Saat 07:35 qatarı yoxdur. Nə birbaşa gələn, nə də ekspres qatar var. Stansiyada sıxlıq yaranıb", - deyə sərnişin bildirib.

Oxu.Az-ın əldə etdiyi məlumata görə, qatarların gecikməsinə səbəb Sabunçu stansiyası ərazisindəki kontakt şəbəkədə yaranan texniki problem olub. Hazırda problemin aradan qaldırılması üçün işlər görülür.

Əzizə İsmayılova