"Paytaxtın Nəsimi rayonunda metronun "Memar Əcəmi" stansiyasının yaxınlığında ictimai iaşə obyektlərində sakinləri narahat edən hallarla bağlı polis əməkdaşları tərəfindən tədbirlər görülür".
Oxu.Az xəbər verir ki, bu barədə danışan Daxili İşlər Nazirliyinin Mətbuat Xidmətinin Media və ictimaiyyətlə əlaqələr şöbəsinin rəisi Anar Qafarov bildirib ki, həmin ərazidə mövcud olan sanitar-epidemioloji vəziyyət, ictimai iaşə obyektlərinin yol verdiyi məişət səs-küyü və digər neqativ hallarla bağlı təkcə son 1 ay ərzində 9 müxtəlif məzmunda profilaktik tədbir keçirilib:
"Buna baxmayaraq, hələ də bəzi obyektlərdə sakinləri narahat edən halların qarşının alınması məqsədilə vətəndaşların müraciətləri nəzarətə götürülüb", - Anar Qafarov qeyd edib.
Metronun "Memar Əcəmi" stansiyasının yaxınlığındakı çay evi kimi fəaliyyət göstərən iaşə obyektləri ilə bağlı Baku TV-nin qaynar xəttinə şikayət ünvanlanıb.
Sakinlər deyiblər ki, bu məkanlarda çalışanların qeyri-etik əməllərinin əlindən küçədən ailə-uşaqla keçmək mümkün deyil.
"Bu problem illərdir davam edir. Gecədən səhərə qədər musiqi səsi gəlir, nalayiq ifadələr, təhqirlər eşidirik. Buranı əxlaqsızlıq yuvasına çeviriblər", - deyə sakinlər narazılıq bildiriblər.
Çəkiliş aparıldığını görən obyekt sahibləri isə çay evlərini bağlayıb ərazidən uzaqlaşmağa başlayıblar. Bir neçə dəqiqədən sonra isə ərazidəki bütün iaşə obyektlərinin işıqları sönüb, qapıları da bağlanıb.
Ətraflı süjeti təqdim edirik:
Metronun "Memar Əcəmi" stansiyasının yaxınlığında yaşayan sakinləri narahat edən hallar polis tərəfindən aradan qaldırılıb
Rəylər