Bakının Binəqədi rayonunun Rəsulzadə qəsəbəsində kanalizasiya problemi sakinləri təngə gətirib.
Bu barədə Oxu.Az-ın qaynar xəttinə (+994 55 224-12-12) müraciət daxil olub.
Vətəndaşların sözlərinə görə, qəsəbənin Zahid Qənbərov küçəsi, 1 ünvanında kanalizasiya sularının yola axması nəticəsində küçənin asfalt örtüyü dağılıb, yol yararsız vəziyyətə düşüb.
Şikayətçi bildirib ki, aidiyyəti qurumun əməkdaşları ərazidə iş apardıqdan sonra yol əvvəlki vəziyyətinə qaytarılmır. Bu isə problemin daha da dərinləşməsinə səbəb olur.

Oxu.Az-ın sorğusuna cavab olaraq İri Şəhərlərin Su Təchizatından bildirilib ki, sözügedən ünvandan keçən su xəttində qeydə alınan axıntının aradan qaldırılması işləri ilə əlaqədar bir neçə gün öncə əraziyə müvafiq rayon sukanal idarəsinin qəza briqadası cəlb olunub:
"Şəbəkədə təmir işləri görülərək axıntının qarşısı alınıb və xətt bərpa edilib. Qazılan hissədəki asfalt örtüyünün bərpası üçün aidiyyəti üzrə müraciət edilib."