Dənizkənarı Bulvarda 1 İyun - Uşaqların Beynəlxalq Müdafiəsi Günü münasibətilə Uşaq İncəsənət Festivalı keçirilir. Tədbir Heydər Əliyev Mərkəzi, Mədəniyyət Nazirliyi, Elm və Təhsil Nazirliyi, eləcə də Dənizkənarı Bulvar İdarəsinin birgə təşkilatçılığı ilə baş tutub.
Festival barədə Oxu.Az-a danışan Mədəniyyət Nazirliyinin əməkdaşı Kənan İbrahimov bildirib ki, uşaqlar üçün tanınmış incəsənət xadimlərinin və UİF-2023 qaliblərinin iştirakı ilə konsert proqramı təşkil olunub:
"Ərazidə ölkənin bütün regionları, o cümlədən Naxçıvan və Şərqi Zəngəzurdan gətirilmiş mədəniyyət nümunələrinin sərgiləndiyi stendlər yer alıb. Uşaqlar üçün interaktiv zonalar yaradılıb, üz bəzədilməsi xidməti pulsuz təqdim olunur. Digər guşələrdə uşaqlar rəsmlər çəkə, oyunlar oynaya və kukla teatr tamaşalarına baxa bilərlər".
Onun sözlərinə görə, tədbirin əsas məqsədi uşaqlara bayram əhvali-ruhiyyəsi bəxş etmək və onların asudə vaxtlarını səmərəli təşkil etməkdir.
K.İbrahimov həmçinin qeyd edib ki, festivalın builki şüarı "Mədəniyyət səninlə tanınır!"dır:
"UİF-2025 yalnız bir tədbir deyil, yeni nəslin səhnədəki səsi, estetik duyumu və milli dəyərlərlə yoğrulmuş yaradıcı enerjisidir. Festival yüzlərlə azyaşlının və gənc istedadın iştirakı ilə möhtəşəm bir bayrama çevrildi".
"Konsert proqramından sonra podyumlarda mədəniyyətin müxtəlif nominasiyalarında iştirak edən uşaqların çıxışları da nəzərdə tutulub. Festival bp şirkəti və "Qala Sığorta"nın dəstəyi ilə həyata keçirilir", - deyə K.İbrahimov qeyd edib.
Aləmdə Nəsib
