Deputat: Azərbaycan polisi olmasa nə Bakıda, nə də bu ölkədə yaşamaq olmaz

Azərbaycan mətbuatında polislə bağlı münasibət birmənalı deyil. Müxtəlif qüvvələr Azərbaycan polisini gözdən salmaq üçün dəridən qabıqdan çıxırlar.

Oxu.Az xəbər verir ki, ANS PRESS-in məlumatına görə, bunu millət vəkili Aqil Abbas parlamentin bugünkü iclasında deyib.

O bildirib ki, Azərbaycan polislərinə dünya polisinə verilən səlahiyyət, silah verilməyib. Deputat qeyd edib ki, inkişaf etmiş ölkələrdə polislər avtomatla gəzirlər: “Amma bizdə görünür ki, sabitlik olduğu üçün polisə silah verilmir. Mən bir dəfə də yazmışdım ki, Azərbaycan polisi xalqı qoruyur, bəs polisi kim qoruyacaq?”.

A.Abbas Maştağada baş verən hadisələri xatırladıb. O, bildirib ki, kənddə baş verən hadisələrdə 2 polis öldürülüb, 1-i yaralanıb: “Polisin silahı olsaydı bunun qarşısını almaq olardı. Mən polisin atəş açmaq məsələsini qabartmaq istəyirəm. Polis hansı halda atəş aça bilər? Bu qanunda müəyyənləşdirilməlidir”.

Deputat deyib ki, Azərbaycan polisi olmasa nə Bakıda, nə də bu ölkədə yaşamaq olmaz.

www.oxu.az