Dəyənəkli "Polat Alemdar"lar və sayrışan işıqlar...

Kubra Məhərrəmova yazır...

Bu gün məlum oldu ki, fevral ayının 5-də bir dəstə kişi əlinə dəyənək götürüb yolun ortasında duran avtomobili şil-küt edib, yiyəsini də döyüblər.

Daxili İşlər Nazirliyinin (DİN) Mətbuat Xidmətinin əməkdaşı Elbrus İbrahimov açıqlamasında bildirib ki, əməli törətməkdə şübhəli bilinən Natiq Mustafakamalov, Vahid Cavadov, Nazim Rəhmanov və Azər Zahidli polis əməkdaşları tərəfindən saxlanılaraq istintaqa cəlb olunublar.

İndi keçək məsələnin daha maraqlı tərəfinə. Sözügedən görüntülər KİV-də və sosial şəbəkələrdə ildırım sürətilə yayıldı və təbii ki, şərhlər videodan daha maraqlı oldu.

Məsələn, sosial şəbəkə istifadəçilərin əsas və hətta daha böyük hissəsi, qeyd etdi ki, yəqin ki, döyülənin nəsə böyük günahı var, ya da kiminsə qızına-arvadına sataşıb ki, adamın avtomobilini də, özünü də döyüblər.

Buradan da aydındır ki, bizim cəmiyyət üçün hər zaman ölən, döyülən, zorakılığa məruz qalan günahkardır.

Bu işıqlı, mütərəqqi, müasir və humanizm dolu fikirlərin üzərindən daha məqama keçid alıram.

Videonun altında artıq Türkiyə vətəndaşlarının da şərhləri görünməyə başladı. Adamlar yazırlar ki, "bizdən öyrəndiniz", "bir azdan küçədə bir-birinizi bıçaqlayarsınız" və s.

Çox maraqlı paraleldir ki, bunu insanlar özləri də etiraf edirlər. Bir anlıq ətrafa, sosial şəbəkəyə, KİV-lərə göz atdıqda ətrafımızda, cəmiyyətimizdə nə qədər "Polat Alemdar"ların olmasına şahid oluruq. Serial qəhrəmanlarının fotosunu özü üçün profil rəsmi edənlər, serialdan sitatları tez-tez paylaşanlar, daxili aləmini "Polat"la bəzəyənlər və s. bəlkə də yüzminlərlədir.

"Kurtlar Vadisi" serialını özünə həyat tərzi seçən bir nəsil yetişdi.

2003-cü ildə ilk mövsümü ortaya çıxan bu filmin saundtreki bir ara soyuducunun qapısını açanda belə səslənirdi. Bəli, bu film, onun qəhrəmanları, musiqisi xalqımızın qəlbini fəth edə bilmişdi.

Qızlarımız Polat kimi sevgili axtarırdı, oğlanlarımız isə özü üçün Polatı ideal obraz seçmişdilər.

Hətta illər sonra yerli telekanalda yayımlanan verilişlərin birində iştirak edən vəkillərdən birinin "Sən kiminlə dans etdiyinin farkında deyilsən" söyləməsi insanımızın "Çukur" serialına aludə olmasını ortaya qoydu.

Bəli, bu dəfə də xalqımızın sevimlisi oğru, cinayətkar, asıb-kəsən, "racon" qoyan serial qəhrəmanı oldu.

İnsanımızın cinayət aləminə bu qədər aludə olmasının mütləq ki, bir səbəbi var. Başağrısı olmasın deyə, uzun-uzadı yazmıram. Əsas səbəblərdən biri təhsildir. Təhsilimiz də göz qabağındadır.

Cəmiyyətimizin bir başında "kabadayı" obrazı durubsa, o biri başında da "çeçenka" saçlı "AUE-çilər" durublar. Bu iki cinah bir-birindən sosial-fəlsəfi düşüncə müstəvisinə görə fərqli qütblərdə dursa da, hər ikisi eyni zibildir. Hər iki dəstə kriminal davranış, narkotik və alkoqoldan geninə-boluna istifadə, yoldan keçənə söz atmağa, üstündə soyuq silah gəzdirməyə meyillidir.

Hər biri də "özündən deyən oğlandır". Amma nə məsələdirsə, bu özündən deyən oğlanlar uzaqdan sayrışan işıqları görən kimi, quzu balasına çevrilirlər. PPX maşınlarını görən kimi rəngləri ağarır.

Əli qana batmış, kriminal fəaliyyətlə məşğul olan, cinayətkar insanları özü üçün qəhrəman müəyyən edən cəmiyyətin təəssüf ki, sonu yoxdur.

"Qanuni oğruların" məzarını özü üçün müqəddəs yer bilənlər, özü bir tərəfə, azyaşlı uşaqlarını ziyarətə aparanlar, uşaqlarının fotosunu çəkib sosial şəbəkələrdə paylaşanlar bunu hansı məqsədlə etdiyini də açığı anlamıram. Cəmiyyətin bu kəsmi sanki məqsədyönlü şəkildə uşaqlarını məhv edir.

Ona görə də bu gün paytaxtın mərkəzində bir dəstə adam maşını da, adamı da dəyənəklə əzib keçir.

Ya qanundan, hüquq-mühafizə orqanlarından qorxmurlar, ya da nəsə başqa bir səbəbi var.

Və bu səbəb normal düşünən insanların sürətlə ölkəni tərk etməsinə gətirib çıxarır...