Baku TV-nin "O vaxtlar" verilişinin budəfəki qonağı Əməkdar mühəndis Fuad Tağı-zadə olub.
O, Bakıdakı uşaqlıq illərindən, köhnə məhəllə xatirələrindən, repressiyaya məruz qalan babasından, metro tikintisində keçdiyi peşə yolundan və ailə dəyərlərindən danışıb. Ailəsinin əslən Gəncədən olduğunu deyən Fuad Tağı-zadə babası Məmmədəli Mollayevin 1937-ci ildə repressiya qurbanı olduğunu xatırladıb:
"Babam nizamipərəst bir insan olub. 1937-ci ilin noyabrında onu həbs etdilər. Dekabrın 12-də isə o vaxtlar "Üçlük" deyilən qurum ona pantürkçü, panislamçı damğası vuraraq inqilab düşməni elan etdi və güllələdi".
Politexnik İnstitutunun Körpü və tunellərin inşası və istismarı fakültəsini əla qiymətlərlə bitirən qonaq uzun illər Bakı metrosunun tikintisində və yeraltı keçidlərin layihələndirilməsində çalışıb.
O bildirib ki, işə başlayanda Bakı metrosunda cəmi 12 stansiya var idi və tunellər tamamilə əl əməyi ilə qazılırdı:
"İndi isə hər şey mexanikləşdirilib. 45 illik əmək fəaliyyətimin 42 ilini metroya həsr etmişəm. Metro ekoloji cəhətdən ən təmiz nəqliyyat növüdür və bizim gələcəyimizdir".
Verilişdə Fuad Tağı-zadənin həyat yoldaşı Nərminə Tağı-zadə ilə də həmsöhbət olunub. Nərminə xanım nənəsinin ona verdiyi və ömrü boyu unutmadığı nəsihəti bölüşüb: "Birinci-ikinci sinfə gedəndə nənəm dedi ki, "qızım, yuxudan duran kimi birinci yorğan-döşəyini yığmalısan. Qız uşağının yatağını heç kim görməməlidir". Bu sözlər mənim üçün həyat dərsinə çevrildi. Mən də öz qızlarımı eyni cür tərbiyə etdim".
