Azərbaycan milli mətbuatının 151 illiyinə həsr olunmuş "Dini mövzuların mediada təqdimatı: Dini sabitliyin qorunmasında birgə məsuliyyət" mövzusunda keçirilən konfrans çərçivəsində "Rəqəmsal media və dini diskurs: İnformasiya manipulyasiyası və dezinformasiya" adlı panel sessiya təşkil olunub.
Oxu.Az-ın məlumatına görə, sessiyaya Dini Qurumlarla İş üzrə Dövlət Komitəsinin sədr müavini Gündüz İsmayılov moderatorluq edib.
O bildirib ki, milli birlik və qarşılıqlı hörmət Azərbaycanın əsas güc mənbəyidir. G.İsmayılov qeyd edib ki, bu dəyərlərin qorunmasında ziyalıların və media nümayəndələrinin üzərinə böyük məsuliyyət düşür: "Hər bir jurnalist dərc etdiyi məlumata görə məsuliyyət daşıyır. Dini mövzular işıqlandırılarkən tərəfsizlik, obyektivlik və peşəkarlıq əsas prinsip olmalı, cəmiyyətə dəqiq və balanslı informasiya təqdim edilməlidir".
Mətbuat Şurasının sədr müavini, əməkdar jurnalist Səadət Məmmədova dini savadlılığın əhəmiyyətindən danışıb. O bildirib ki, dini savadlılıq hər hansı bir əqidəni təbliğ etmək deyil, dinə sosioloji, tarixi və mədəni fenomen kimi yanaşa bilmək bacarığıdır:
"Sosial şəbəkələrdə dini məzmunlu paylaşımların təsiri artdıqca, peşəkar medianın üzərinə düşən ictimai məsuliyyət də artır. Biz hər mövzuda "qırmızı xətt"in harada olduğunu bilməliyik".
S.Məmmədova əlavə edib ki, dini mövzular cəmiyyətdə həssas qəbul olunduğundan, jurnalistlər çox vaxt cəsarətdən daha çox ehtiyatlı davranmağa üstünlük verirlər.
Azərbaycan İlahiyyat İnstitutunun "Dinşünaslıq" kafedrasının müdiri Anar Qafarov isə qloballaşma və rəqəmsallaşmanın milli təhlükəsizlik anlayışını dəyişdiyini diqqətə çatdırıb. Onun sözlərinə görə, ideoloji təhlükəsizlik cəmiyyətin mənəvi-intellektual suverenliyinin qorunması üçün vacibdir: "İdeoloji müharibələr görünməz xarakter daşıdığı üçün daha təhlükəlidir. Bu müharibələr insanların düşüncəsini hədəf alır, dini məfhumların mahiyyəti dəyişdirilir və onlara radikal məzmun qazandırılır".
Ekspert Şəfəq Mehrəliyeva süni intellekt dövründə dini diskursun düzgün qurulmasının sosial və mənəvi əhəmiyyətinə toxunub. O bildirib ki, media orqanları xəbər başlıqlarında çox diqqətli olmalıdır: "Başlıqlar bəzən cəmiyyətdə yanlış təsəvvür yaradır. Bir xəbərin başlığı hansısa bölgə və ya icma haqqında mənfi rəy formalaşdıra bilər və sonradan bunu aradan qaldırmaq daha çətin olur".
Panel sessiya maraqlı müzakirələr və sual-cavablarla yekunlaşıb.
