Türkiyədə "Ahbap" dərnəyi ilə bağlı aparılan istintaq çərçivəsində saxlanılan Nurdan Erişin hakimə verdiyi ifadənin detalları üzə çıxıb.
Oxu.Az "Haber Global"a istinadən xəbər veririk ki, Nurdan Eriş ifadəsində məşhur müğənni Haluk Levent ilə evli olduğunu və müğənninin ondan sui-istifadə etdiyini iddia edib.
Nurdan Eriş ifadəsində bunları bildirib:
"Bu bəylə 2016-cı ildə İsveçrədə tanış olmuşam. Mənim orada qurulmuş biznesim var idi. Bu adam məni emosional olaraq manipulyasiya etdi. Haluk Leventlə İsveçrədə bir evliliyimiz var. Uşaqlarım atasız böyüdükləri üçün ona bağlandılar. O, məni aldatdı. 2018-ci ildə orada evləndik. Həmin il şirkətimi satdım. Bundan əvvəl də ABŞ-dəki şirkətimdən ona pul göndərmişdim. O, məndən istifadə etdi. 2018-ci ildə öz şirkətimi satdım və təxminən 30 milyon frank əldə etdim. Çox vaxt deyirdi ki, borclarım var, onları ödəməliyəm, sələmçilər var, mafiya məni təqib edir. Bir dəfə də pandemiya dövrü idi. "Ahbap" adlı bir layihə ərsəyə gətirmişdilər və mən də ora pul göndərdim. Xaricdə yaşadığım üçün mənim sadəlövh olduğumu düşünürdü. O pulları da ona birbaşa göndərmədim. Dediyi kimi, əvvəlcə Emrah bəyə, sonra isə Zafer Yaya göndərdim.
Həmin dövrdə Yelizə (Haluk Leventin köməkçisi Yeliz Kaya - red.) pul göndərdiyimi heç xatırlamıram. Keçən həftə ən son məndən 15 000 lirə istədi. Dedim ki, heç nəyim qalmayıb. Ondan nə edəcəyini soruşdum. Dedi ki, çek məsələsinə (Haluk Leventin kommersiya əməliyyatlarında istifadə etdiyi çeklərin qarşılıqsız olması ilə bağlı məhkəmə işi - red.) görə pula ehtiyac var. Soruşdum ki, həll olunacaqmı? Dedi ki, bəli. Soruşdum ki, vəziyyəti yoluna qoya biləcəksənmi? Dedi ki, bəli. Dedi ki, konsertlərim davam edə bilər. Hazırda özümü axmaq kimi hiss edirəm. Uşaqlarım balacadır. Kiçik qızım özünə zərər verməyə başlayıb. Mən də bu pulları istədim. İlk vaxtlar Emrah, sonra Zafer, daha sonra Yeliz vasitəsilə göndərdi.
Mənim heç nəyim qalmadı. Ən son Yelizə göndərdim. Bir neçə il əvvəl məndən Türkiyəyə gəlməyimi istədi və mən də gəldim. Ev kirayələdik. Uşaqlarımı məktəbə göndərdim. Məktəb pulunu və yaşayış xərclərini də göndərdi. İndi köhnə şirkətimə qayıtmışam. Oradan bir gəlirim var. Dedim ki, artıq səndən pul istəmirəm, sadəcə borclarımı bağla. 4-5 ildir evə heç gəlmirdi. Aradabir gəlirdi. Mən onsuz da ondan boşanmaq qərarına gəlmişəm. Burada nəyinsə səhv olduğunu anladım, amma gec anladım. Çünki inanmaq istədim, çünki bütün Türkiyə güvənirdi, etibar edirdi, zərər çəkmiş qızları xilas edirdi", - deyə Nurdan Eriş bildirib.
Qeyd edək ki, İstanbul Baş Prokurorluğunun "Ahbap" dərnəyi ilə bağlı istintaqı çərçivəsində dərnəyin və bütün şübhəlilərin əmlakları ehtiyat tədbiri olaraq müsadirə edilib.
Eyni zamanda istintaq çərçivəsində aparılan ikinci əməliyyat dalğası zamanı saxlanılan 12 şübhəlidən 6-sı prokurorluqda ifadə verdikdən sonra həbs tələbi ilə Sülh Cəza Məhkəməsinə göndərilib. Həbsi tələb edilən şübhəlilər arasında artıq başqa bir iş üzrə həbsdə olan Haluk Leventin qardaşı Berkant Acil də var.
Türkiyədə məşhur müğənni Haluk Leventin qurucusu olduğu "Ahbap" dərnəyi adından toplanan ianələrin şübhəlilərin hesablarına köçürülməsi iddiaları ilə bağlı istintaq çərçivəsində Haluk Levent də daxil olmaqla 14 şübhəli həbs edilib.
Bu barədə Oxu.Az "Haber Global"a istinadən xəbər verir.
Məlumata görə, İstanbul Baş Prokurorluğunda aparılan araşdırmalar üzrə Haluk Levent və digər 25 şübhəli ilə bağlı prosedurlar tamamlanıb.
Müğənninin də aralarında olduğu 14 şübhəli barəsində həbs qətimkan tədbiri seçilib, 11 şübhəliyə isə məhkəmə nəzarəti tədbirlərinin tətbiq edilməsi qərara alınıb.
Həmçinin jandarm qrupları tərəfindən saxlanılan 17 şübhəlinin məhkəmə prosesi davam edir.
Xatırladaq ki, İstanbul Polis İdarəsinin Maliyyə Cinayətləri ilə Mübarizə İdarəsi tərəfindən İstanbul Baş Prokurorluğunun koordinasiyası ilə aparılan "Cinayət törətmək məqsədilə təşkilat yaratmaq", "Ağır fırıldaqçılıq" və "Cinayət yolu ilə əldə edilən mal varlığı dəyərlərinin yuyulması" maddələri üzrə əməliyyat keçirilmiş və "Ahbap"ın təsisçisi Haluk Levent də daxil, dərnək üzvü və onun əməkdaşları ilə əlaqəsi olduğu müəyyən edilən 17 şübhəli saxlanılmışdı. Daha sonra 9 şübhəli də nəzarət altına alınmışdı.
Şübhəlilərdən biri polis bölməsində prosedurlardan sonra sərbəst buraxılmış, 25 şübhəli isə məhkəməyə göndərilmişdi.
