Azərbaycan vətəndaşı Türkiyədə vəfat edən yaxınını ölkəmizə gətirmək üçün ondan yeddi min ABŞ dolları tələb edildiyi ilə bağlı paylaşım edib. Paylaşıma şərh yazan vətəndaşların hər biri yaxınlarının meyitlərini müxtəlif qiymətlərə ölkəyə gətirdiklərini qeyd ediblər.
Bəs görəsən, başqa ölkədə vəfat etmiş birinin meyitini ölkəmizə gətirmək üçün rüsum varmı? Bu rüsumlar nəyə əsasən təyin olunur? Ölkədən-ölkəyə fərq varmı, yoxsa qiymət stabildir?
Oxu.Az-ın əməkdaşı sözügedən məsələ ilə bağlı AZAL-ın Mətbuat Xidmətinə sorğu ünvanlayıb.
AZAL-ın Mətbuatla iş şöbəsinin rəhbəri Fərid Hüseynov sorğumuza cavab olaraq qeyd edib ki, aviaşirkətlərin cənazə daşınması üçün məsafələr üzrə öz rüsumları var:
"Qlobal müstəvidə fəaliyyət göstərən bir çox aviaşirkətlər kimi, Azərbaycan Hava Yolları (AZAL) da cənazələrin daşınması prosesini həyata keçirir.
Cənazələrin daşınması zamanı uçuş məsafəsi və istiqamət nəzərə alınmaqla ölkələr üzrə fərqli rüsumlar tətbiq olunur (bəzi hallarda dövlət rüsumları daxil olmaqla). Cənazənin daşınması üçün ilkin mərhələdə AZAL-a müraciət olunmalıdır. Müraciət daxil olduqdan sonra daşınma prosesi AZAL-ın müvafiq ölkədə fəaliyyət göstərən yük agentinə yönləndirilir. Mümkün olduğu halda həmin gün ərzində cənazə ölkədən təyinat nöqtəsinə göndərilir.
Cənazənin daşınması üçün aşağıdakı sənədlər yük agentinə təqdim olunmalıdır:
- Ölüm haqqında tibbi şəhadətnamə;
- Məhkəmə-Tibbi Ekspertiza və Patoloji Anatomiya Birliyi tərəfindən verilən arayış ("Embalming Certificate");
- Azərbaycan Respublikası Dövlət Gömrük Komitəsinin Hava Nəqliyyatında Baş Gömrük İdarəsinə səfirlik tərəfindən yazılmış məktub;
- Vəfat edənin ləğv olunmuş pasportu;
- AZAL-a ünvanlanmış məktub".
Qonşu ölkələr üzrə qiymətlərin neçə olduğunu öyrənmək üçün AZAL-ın çat xidmətinə yazsaq da, hazırda belə servisin olmadığı qeyd edilib.
Cənazə daşınması ilə bağlı situasiyada Heydər Əliyev adına Beynəlxalq Hava Limanının hansısa funksiya və ya öhdəlik daşıyıb-daşımadığını öyrənmək üçün sorğu ünvanladıq.
Qurumun mətbuat xidmətinin rəhbəri Nərmin Xəlilova Oxu.Az-a açıqlamasında bildirdi ki, cənazələri aviaşirkətlər gətirirlər:
"Həmin aviaşirkətlər Heydər Əliyev adına Beynəlxalq Hava Limanı ilə hesablaşmırlar".
Məhərrəm Əliyev
