İki övladı da xəstə olan ana: "Günlərlə evə çörək belə ala bilmirəm"

Yusif və Dünyamin Hüseynovların yardımsevər şəxslərin dəstəyinə ehtiyacı var.

Bu barədə Oxu.Az-a onun anası Günel Əsgərova məlumat verib.

O bildirib ki, övladlarının müalicəyə ehtiyacı var:

"Bir il öncə torpağımı sataraq Yusifi İrana müalicəyə apardım. Həkim orada Yusifin başına maye yığıldığını və təcili əməliyyata ehtiyacı olduğunu dedi. Biz ötən ilin oktyabr ayında yenidən İrana gedərək onun əməliyyatını etdirdik. Hazırda həkimlər Yusifin başına yenidən maye yığıldığını deyirlər. Bu, Yusifin görməsinə də ciddi əngəl törədir. Artıq iki aya yaxındır sizin saytın izləyicilərinin dəstəyi ilə onun gözünə görə olan müalicələrini edə bilirik. Dünyaminin uzun müddət idi ayaqları tutulur, yaddaşı itirdi. Müalicələrini etdiyimiz zaman bu problem, demək olar ki, tamamilə itmişdi. Bir neçə gün əvvəl mən Yusifi Bakıya yenidən müalicəyə gətirdim. Dünyaminin dərsdə halı pisləşib, yenə yıxılıb. Onu təcili həkimə apardıq. Həkim müalicələri yenidən etməli olduğumuzu dedi".

Günel Əsgərova övladlarına təkbaşına baxdığını deyib:

"Mənim Yusifdən əlavə iki övladım da var. Onların atası illər əvvəl bizdən ayrılıb, özünə yeni həyat qurub. Övladları ilə maraqlanmır, heç bir dəstəyi də yoxdur. Özüm ikinci qrup əliləm, bir qolum işləmir. Buna görə də iş tapıb işləyə bilmirəm. Elə vaxt olur ki, günlərlə çörək ala bilmirəm evə. Apteklərdən borca dərman alıb onları sağaltmağa çalışıram. Üzümü xalqıma tutub onlardan balalarıma dəstək olmalarını xahiş edirəm. İnanın, elə çıxılmaz vəziyyətdəyəm ki, ağlımı tamamilə itirmişəm".

Ailə ilə əlaqə: (051) 819-60-21.

"Kapital Bank": 4169 7388 3782 1028.