İnternat məktəblərinin siniflərində şagirdlərin maksimum sayı müəyyən olunub

Xüsusi ümumtəhsil məktəblərinin, internat tipli xüsusi ümumtəhsil məktəblərinin, inteqrasiya təlimli təhsil müəssisələrinin və inteqrasiya təlimli internat tipli ümumtəhsil məktəblərinin siniflərində (qruplarında) şagirdlərin maksimum sayı müəyyən olunub.

Oxu.Az xəbər verir ki, Nazirlər Kabineti bu barədə qərar verib.

Qərarla xüsusi ümumtəhsil məktəblərinin, internat tipli xüsusi ümumtəhsil məktəblərinin, inteqrasiya təlimli təhsil müəssisələrinin və inteqrasiya təlimli internat tipli ümumtəhsil məktəblərinin siniflərində (qruplarında) şagirdlərin maksimum sayı aşağıdakı qaydada müəyyənləşdirilir:

- eşitmə qabiliyyəti tam məhdud olan şəxslər üçün - 8 nəfər;

- eşitmə qabiliyyəti qismən məhdud olan və eşitmə qabiliyyətini sonradan tam itirmiş şəxslər üçün - 10 nəfər;

- nitq pozuntuları olan şəxslər üçün - 12 nəfər;

- görmə qabiliyyəti tam və qismən məhdud olan şəxslər üçün - 12 nəfər;

- əqli (psixi) pozuntuları (əqli geriliyi və ağır əqli geriliyi, psixi inkişaf ləngliyi olanlar) olan şəxslər üçün - 10 nəfər;

- emosional-iradi sahədə və davranışında çatışmazlıq olan şəxslər üçün - 12 nəfər;

- dayaq-hərəkət aparatının funksiyalarının pozuntuları və skolioz xəstəliyi olan şəxslər üçün - 10 nəfər;

- xroniki somatik xəstəlikləri olan şəxslər üçün - 10 nəfər;

- mürəkkəb çatışmazlıqları olan şəxslər üçün - 6 nəfər.

Əqli geriliyi və ya fiziki çatışmazlığı olan şagirdlər üçün əmək təlimi və istehsalat hazırlığı sinifləri beş nəfərdən az olmamaqla komplektləşdirilir. Ümumi təhsil müəssisələrində təşkil edilən inklüziv təhsil sinfi 22 uşaqla (sağlamlıq imkanları məhdud olan uşaqlar iki nəfərdən artıq olmamaqla) komplektləşdirilir.