Kubanıçbek Omuraliyev TDT ölkələrinin kosmik agentliklərinin dördüncü görüşündə çıxış edib

"Türk Dövlətləri Təşkilatı olaraq biz kosmosun tədqiqinin yalnız texnologiya deyil, eyni zamanda əməkdaşlıq, innovasiya və ortaq gələcəyin qurulması ilə bağlı olduğunu dərk edirik".

Oxu.Az xəbər verir ki, bunu TDT-nin baş katibi Kubanıçbek Omuraliyev Bakıda keçirilən təşkilat ölkələrinin kosmik agentliklərinin dördüncü görüşündə deyib.

O bildirib ki, bu gün kosmik texnologiyalar ətraf mühitin monitorinqindən tutmuş təbii fəlakətlərin idarə olunmasına, təbii ehtiyatların tədqiqindən təhsilə və potensialın artırılmasına qədər qarşılaşdığımız qlobal çağırışların bir çoxunun həllində açar rol oynayır:

"Üzv və müşahidəçi ölkələrimizin bu sahədə əldə etdiyi nailiyyətlər bizim birgə əməkdaşlığımızın və ortaq məqsədlərə sadiqliyimizin əhəmiyyətini bir daha nümayiş etdirir".

Aygün Mirakif