Bakı 2015 Avropa Oyunları Əməliyyat Komitəsi bu gün McDonald’s şirkətini gələn il keçiriləcək tarixi idman yarışlarının Rəsmi Tərəfdaşı elan etməsi ilə fəxr edir.
Oxu.Az xəbər verir ki, bu tərəfdaşlığa McDonald’s şirkətinin restoranları, eləcə də, Bakı şəhərində və Azərbaycanın hər yerində ilk Avropa Oyunları haqqında məlumatların çatdırılmasına yönələn marketinq kampaniyaları daxilində brend tərəfdaşlığı daxildir.
Bundan başqa, McDonald’s şirkəti öz restoranlarında müştərilərə məlumat verməklə Oyunlarla bağlı yarışlar və Bakı 2015 Avropa Oyunları üçün xüsusi olaraq tərtib olunmuş müxtəlif qidalardan ibarət menyu vasitəsilə Azərbaycanın hər yerində Avropa Oyunları ilə bağlı təbliğat işi aparacaq.
Bakı 2015 Avropa Oyunları Əməliyyat Komitəsinin Əməliyyatlar üzrə Baş Direktoru cənab Saymon Kleq qeyd edib: “McDonald’s brendi dedikdə bütün dünyada əsas beynəlxalq idman yarışları yada düşür və mən şirkətin birinci Avropa Oyunlarının Rəsmi Tərəfdaşı olması haqqında sazişə imza atdığımızdan məmnunam.
“Sözügedən saziş bütün Azərbaycanda Bakı 2015 Avropa Oyunları haqqında daha çox məlumatın yayılmasına imkan yaradacaq. Mən əminəm ki, bu imkan gələn yay Bakı şəhərində keçiriləcək tarixi və unudulmaz idman yarışlarına daha çox maraq oyadacaq.”
McDonald’s şirkətinin Azərbaycandakı bütün restoranlarında aparılacaq marketinq kampaniyaları hər ay təxminən 750,000 müştərini əhatə edəcək.
McDonald’s şirkətinin Azərbaycandakı filiallarının icraçı direktoru cənab Maqsud Mirzəyev qeyd edib: “Azərbaycan üçün bu dərəcədə əhəmiyyətli olan yarışlara dəstək göstərmək McDonald’s üçün böyük şərəfdir.
“Biz restoranlarımıza gələn müştərilərimiz arasında Avropa Oyunlarını daha da unudulmaz edəcək və məşhurlaşdıracaq yaradıcı marketinq strategiyalarının hazırlanmasına bütün səylərimizi və təcrübəmizi qoymağa çalışacağıq.”
Bakı 2015 Avropa Oyunları Əməliyyat Komitəsinin Kommersiya şöbəsinin direktoru cənab Çarli Vijeratna əlavə etmişdir: “McDonald’s şirkətinin malik olduğu böyük nüfuzu nəzərə alsaq, onun Oyunlara göstərdiyi dəstəyə etibar etmək çox gözəldir. Bu dəstək bizim Bakı 2015 brendimizə olan etibarı daha da artıracaq.”
McDonald’s şirkəti 1976-cı ildən etibarən hər Olimpiya və Qış Olimpiya Oyunlarının Əsas sponsoru olmuş və 2012-ci ildə sponsorluğunu daha səkkiz il müddətinə uzatmışdır. Şirkət, eyni zamanda, FİFA Dünya Kuboku kimi digər əsas beynəlxalq idman yarışlarında da təcrübə və təsdiqlənmiş bacarığa malikdir.
Qeyd edək ki, 2015-ci ilin 12-28 iyun tarixlərində keçiriləcək Bakı 2015 birinci Avropa Oyunları Avropa qitəsi üçün çoxsaylı idman növləri üzrə baş tutacaq çox maraqlı və innovativ yarışlar olacaq.
Bakı 2015 Avropa Oyunları ümumilikdə 19 idman növü üzrə keçiriləcək: bunlardan 16-sı Olimpiya idman növü və üçü qeyri-olimpiya idman növü olacaq. Avropanın müxtəlif ölkələrindən 6000-dən çox idmançının 17 yarış günü müddətində öz ölkələrini təmsil edəcəyi gözlənilir.
Doqquz idman növü 2016-cı il Rio-de-Janeyro Yay Olimpiya Oyunları üçün seçmə yarışlara imkan yaradacaq. Həmin idman növlərinə oxatma, yüngül atletika, çimərlik voleybolu, velosiped idmanı, atıcılıq, üzgüçülük, stolüstü tennis, taekvondo və triatlon daxildir.
Avropa Oyunlarının keçirilməsi 2012-ci ilin dekabr ayında Avropa Olimpiya Komitələri (AOK) tərəfindən Bakı şəhərinə həvalə olunmuşdur. Bakı Avropa Oyunları Əməliyyat Komitəsi (BEGOC) AOK ilə əməkdaşlı şəkildə Oyunları təşkil və idarə edəcək.
