"Ümumi orta təhsil müəssisələrində payız tətili ilə əlaqədar bəzi küçə və prospektlərdə əvvəlki günlərlə müqayisədə tətil zamanı nəqliyyat sıxlığında azalma müşahidə olunub və nəqliyyat vasitələrinin orta hərəkət sürətində artım qeydə alınıb".
Bu sözləri Oxu.Az-a açıqlamasında Daxili İşlər Nazirliyinin Nəqliyyatı İntellektual İdarəetmə Mərkəzinin (NİİM) İctimaiyyətlə əlaqələr sektorunun müdiri Ömər Xıdırov deyib.
O bildirib ki, noyabrın 16-20-si tarixlərində ümumi orta təhsil müəssisələrində payız tətili ilə bağlı NİİM tərəfindən paytaxt yollarında nəqliyyat axının dinamikası təhlil edilib:
"Təhlillər göstərir ki, orta hərəkət sürətində artım, əsasən, 8 Noyabr, Heydər Əliyev, Azadlıq, Mətbuat, Azərbaycan, Xətai prospektləri və 28 May, Səməd Vurğun küçələrində qeydə alınıb.
Bununla yanaşı, günün pik saatlarında intensiv hərəkətin olduğu bəzi yollarda orta hərəkət sürəti və sıxlıq müddəti ilə bağlı ümumi vəziyyət dəyişməyib. Həmçinin paytaxtın ayrı-ayrı küçə və prospektlərində orta sürətin azaldığı hallar da müşahidə edilib.
Tətil günləri bəzi yollarda sıxlığın azalması əhalinin həmin günlərdə şəxsi avtomobillərdən daha az istifadə etməsi ilə izah olunur".
Xatırladaq ki, mövzu ilə bağlı bir neçə gün əvvəl Oxu.Az NİİM-ə sorğu vermiş və bildirilmişdi ki, yaxın günlərdə monitorinq nəticələri açıqlanacaq.
Aygün Mirakif
