Vüqar Həşimovun anasının əməliyyatı yubanır

Sumqayıt şəhəri, Sahil küçəsi, Novxanı bağlar massivində fərdi yaşayış evində baş verən partlayışda xəsarət alan mərhum şahmat ustası Vüqar Həşimovun anasının əməliyyatı yubanır.

Bu barədə Oxu.Az-a mərhum qrosmeysterin bacısı Samirə Allahverdiyeva məlumat verib.

O bildirib ki, anası Aida Həşimova "Yeni Klinika"dan özəl tibb müəssisələrindən birinə təxliyə olunub:

"Özəl tibb müəssisəsindəki həkimlər anamı müayinə etdikdən sonra əməliyyatın vaxtını uzatmağa qərar verdilər. Əməliyyatın iki-üç gün sonra keçirilməsi nəzərdə tutulub".

Xatırladaq ki, sözügedən partlayışda xəsarət alanlar mərhum şahmat ustası Vüqar Həşimovun valideynləri Qasım Həşimov və Aidə Həşimovadır.

Anar Həsənov

12:12

Sumqayıt şəhəri, Sahil küçəsi, Novxanı bağlar massivində yerləşən fərdi yaşayış evində partlayış zamanı xəsarət alan şəxslərin son vəziyyətləri açıqlanıb.

Tibbi Ərazi Bölmələrini İdarəetmə Birliyindən (TƏBİB) Oxu.Az-ın sorğusuna cavab olaraq bildirilib ki, Novxanı bağlar massivində fərdi yaşayış evində partlayış baş verməsi səbəbi ilə xəsarət alan 1949-cu il təvəllüdlü şəxsin (kişi cinsli) müalicəsi TƏBİB-in tabeliyindəki Mərkəzi Neftçilər Xəstəxanasının Reanimasiya şöbəsində davam etdirilir.

"Hazırda vəziyyəti ağır-stabildir. Bədən səthinin 55%-ni əhatə edən 2-ci və 3-cü dərəcəli yanıq xəsarətləri ilə xəstəxanaya yerləşdirilən şəxsin yaraları cərrah tərəfindən izlənilir.

TƏBİB-in tabeliyindəki "Yeni Klinika"ya təxliyə olunan 1959-cu il təvəllüdlü şəxsin isə (qadın cinsli) müalicəsi Reanimasiya şöbəsində aparılıb.

Bədənin müxtəlif nahiyələrində çox sayda cırılmış, kəsilmiş, didilmiş yaralar və sol əlinin ovuc nahiyəsində dərin kəsik yarası diaqnozu təyin edilib, eyni zamanda rentgen və tomoqrafiya müayinələrindən sonra hər iki bud sümüyünün aşağı hissəsində qapalı yerdəyişməli qırıq aşkarlanıb.

Pasiyentə zəruri tibbi xidmətlər göstərilib. Daha sonra ailə üzvlərinin istəyi ilə özəl tibb müəssisələrindən birinə təxliyə olunub", - deyə açıqlamada vurğulanıb.

Xatırladaq ki, sözügedən partlayışda xəsarət alanlar mərhum şahmat ustası Vüqar Həşimovun valideynləri Qasım Həşimov və Aidə Həşimovadır.

Əzizə İsmayılova