Şuşaya səfər edən bəzi şəxslərin tarixi əhəmiyyət daşıyan qayaların üzərinə müxtəlif yazılar yazması, adlarını həkk etməsi narazılıq doğurub. Məsələ ilə bağlı indiyədək bir sıra tədbirlər görülsə, qayalara ziyan vuran şəxslər cərimələnsə və onlara izahat verilsə də, bu cür halların hələ də təkrarlandığı bildirilir.
Təbii ki, Şuşanın tarixi və mədəni irsinin qorunması hər bir azərbaycanlının üzərinə düşən mənəvi məsuliyyətdir. İşğaldan azad edildikdən sonra şəhərin əvvəlki simasının bərpası ilə yanaşı, onun təmizliyinə və tarixi abidələrinin qorunmasına da xüsusi diqqət göstərilir. Şuşaya gələn hər bir insan bu qədim şəhərin zəngin tarixini və mədəni irsini öz davranışı ilə qorumalı, ona layiq münasibət sərgiləməlidir.
Birinci Qarabağ müharibəsi veteranı, Şuşa sakini Şünasib Babayev də baş verənlərə etiraz edənlər arasındadır. O, Oxu.Az-a açıqlamasında deyib ki, Şuşanı göz bəbəyimiz kimi qorumalıyıq:
"Bir şuşalı kimi hamıdan xahiş edirəm ki, öz evlərini necə qoruyurlarsa, Şuşanı da elə təmiz saxlasınlar. Çünki Şuşa hamımızındır. İllərlə Şuşanın həsrəti ilə yanıb-yaxılmışıq, ona görə də bu torpağa münasibətdə daha həssas və diqqətli olmaq lazımdır. Burada şəhidlərimizin, qazilərimizin qanı tökülüb. Veteranlarımız onların zibillədiyi, ad yazdığı yerlərdə can qoyublar. Bunu birgünlük yox, ömürlük yadda saxlamaq lazımdır. Şuşa bizim qan yaddaşımızdır və təkcə şuşalıların yox, bütün Azərbaycanındır. Allaha şükür, indi işğaldan azad olunub. Allah şəhidlərimizə rəhmət eləsin, bütün qazilərimizə cansağlığı versin".
"Biz həmişə "Şuşa" deyirdik, artıq azad olunub. Azad olunandan sonra onun qədrini bilməliyik, nəinki belə xoşagəlməz davranışlar sərgiləmək. Biz, yəni hazırda Şuşada yaşayanlar belə hallarla rastlaşanda bir-birimizlə məsləhət-məşvərət edirik ki, hər kəs belə hallara qarşı etiraz etsin", - deyə Şuşa sakini vurğulayıb.
O, bu davranışların turizm baxımından da düzgün olmadığını əlavə edib:
"Bura həm yerli, həm də xarici turistlər gəlirlər. Əgər Şuşa mədəniyyət şəhəridirsə, deməli, mədəniyyətimizi də göstərməliyik. Şuşaya qıymamalıyıq ki, yerə bir kağız parçası belə atılsın. Amma təəssüf ki, yenə də belə hallar olur. Hər birimiz Şuşaya ürəkdən yanmalı və yanaşmalıyıq".
