Bakının Nizami rayonunda yolun çökməsi vətəndaşların narazılığına səbəb olub.
Oxu.Az xəbər verir ki, bununla bağlı videogörüntü sosial şəbəkələrdə müzakirə mövzusu olub.
Qeyd olunub ki, bu yol 61 nömrəli məktəbə gedir və onun bu vəziyyətdə olması ciddi problem yaradır.
Məsələ ilə bağlı Oxu.Az-ın sorğusuna cavab olaraq Nizami Rayon İcra Hakimiyyətindən fakt təsdiqlənib.
Bildirilib ki, həmin ünvanda yeni inşa olunmuş çoxmənzilli yaşayış binasına müvafiq icazəverici sənədlər əsasında kanalizasiya xətti çəkildikdən sonra asfalt örtüyü bərpa olunub.
"Lakin aramsız yağan yağışlar zamanı yağış sularının təsirindən təmir olunmuş asfalt örtüyünün bir hissəsində çökmə baş verib.
Bildiririk ki, hava şəraitindən asılı olaraq qeyd olunan ünvanda asfalt örtüyünün çökmüş hissəsi yaxın günlərdə bərpa olunacaq", - deyə məlumatda vurğulanıb.
Əzizə İsmayılova
