"Kapotun altında ikilitrlik öz motorudur, amma ötürmələr qutusu dəyişdirilib"
Oxu.Az xəbər verir ki, bu barədə paytaxtın Əziz Əliyev küçəsindən başlayaraq Qoşa Qala qapısınadək "Sürətin evolyusiyası" layihəsi çərçivəsində keçirilən klassik avtomobillərin sərgisinin iştirakçısı Elmar Sərdərov bildirib.
E.Sərdərovun sözlərinə görə, onun təqdim etdiyi maşın ölkənin ən yaşlı nəqliyyat vasitəsidir:
"Mercedes-Benz" şirkətinin istehsalıdır, bu model "Roselli" adlanır. İki il əvvəl gətirmişəm və keçən il ölkənin ən yaşlı maşını kimi qeydiyyatdan keçirmişəm".
Raritet avtomobilin sahibi onun xüsusiyyətlərindən də danışıb:
"Kabrioletdir, üstünü özüm açıb yığıram. İkilitrlik motorla maksimum 100 km/saat sürət yığmışam, amma spidometrdə hədd 120-dir. Maşın üzərində bəzi restaylinq işləri görmüşəm".
E.Sərdərov sonda sərginin əhəmiyyətindən danışaraq qeyd edib ki, bu cür tədbirlərdə həm öz maşınını göstərir, həm də digər raritetləri görür, eyni zamanda, paytaxt sakinləri və qonaqları da sərgidən zövq alırlar.
Xatırladaq ki, bu gün başlayan sərgi sabah sürət avtomobillərinin nümayişi ilə davam edəcək.
Rəhim Əliyev
