"Orta Dəhliz bütün iştirakçılar üçün kommersiya baxımından cəlbedici olmalıdır".
Oxu.Az xəbər verir ki, bu fikirləri Avropa Yenidənqurma və İnkişaf Bankının Azərbaycandakı Rezident Ofisinin rəhbərini Natali Mouravidze Avropa İttifaqı-Azərbaycan biznes forumunda deyib.
O bildirib ki, dəhlizin uzunmüddətli uğuru infrastruktur sahibləri, operatorlar, logistika xidmətləri göstərən şirkətlər, biznes subyektləri və investorlar üçün kifayət qədər yük həcminin və biznes imkanlarının yaradılmasından asılıdır:
"Çoxtərəfli inkişaf banklarının əlavə dəyər yarada biləcəyi əsas istiqamətlərdən biri də məhz budur. Biz yalnız maliyyələşdirmə ilə kifayətlənmirik. İslahatları dəstəkləyir, layihələrin hazırlanmasına kömək edir, investorlar, infrastruktur sahibləri, tənzimləyici qurumlar və hökumətlər arasında əlaqələndirici rol oynayırıq.
Nəqliyyat əlaqələrini inkişaf etdirərkən unutmamalıyıq ki, bu imkanlar yalnız daşımalarla məhdudlaşmır. Daha geniş dayanıqlı inkişaf və enerji keçidi hədəfləri ilə uzlaşdırıldıqda Orta Dəhliz bütövlükdə daha geniş regionda iqtisadi transformasiyanın real hərəkətverici qüvvəsinə çevrilə bilər".
Qurum rəsmisi vurğulayıb ki, ən böyük imkan Orta Dəhlizi sadəcə nəqliyyat marşrutundan iqtisadi dəhlizə çevirməkdir:
"Özəl kapitalın, hökumətlərin və bizim kimi inkişaf institutlarının birgə fəaliyyəti ən böyük nəticəni məhz bu istiqamətdə verə bilər".
