Orxan Əsgərovun atası: "İran tərəfi təklif etdi ki, edam kəndirini mən çəkim"

Azərbaycanın Tehrandakı səfirliyinə hücum edən Yasin Hüseynzadənin edam cəzası bu gün səhər saatlarında icra edilib.

Hücum zamanı şəhid olan səfirliyimizin mühafizə xidmətinin rəisi Orxan Əsgərovun atası Rizvan Əsgərov Oxu.Az-a açıqlamasında bildirib ki, iki ildən artıq idi ki, terrorçunun edam qərarının icrasını gözləyirdi:

"Çünki qərar verilsə də, icra olunmurdu. Prezident İlham Əliyevə təşəkkür edirəm ki, onun qəti mövqeyi olmasaydı, bu edam hökmü icra olunmayacqdı".

O bildirib ki, övlad ağrısı ilə yanaşı, onun qatilinin cəzasını almaması çox çətin idi:

"Çox şükür ki, terrorçunun edamı bizim yaramızın üstünə az da olsa, su səpdi. Çünki övlad ağrısı heç vaxt unudulmur. Sanki övladımızın yanında günahımız azaldı. Çünki özümüzü günahkar hiss edirdik ki, onu qətlə yetirən öz cəzasını almayıb".

"İran tərəfinin təklifi bu idi ki, edam qərarını mən icra edim, edam kəndirini mən çəkim. Lakin Azərbaycanda ölüm hökmü yoxdur və mən də Azərbaycan vətəndaşıyam deyə başqa ölkədə kimisə edam etməyə hüquqi cəhətdən ixtiyarım yoxdur. Bu baxımdan məsələ İran tərəfinə izah olundu, onlar da başa düşdülər. Prosesdə bizim vəkilimiz və İrandakı səfirliyimizin iki əməkdaşı iştirak edib. Edamı da İran hüquq-mühafizə orqanlarının əməkdaşları icra ediblər", - deyə Orxan Əsgərovun atası əlavə edib.

Xatırladaq ki, 27 yanvar 2023-cü il tarixində Azərbaycanın Tehrandakı səfirliyinə hücum edən İran vətəndaşı Yasin Hüseynzadə "Kalaşnikov" markalı avtomat silahla mühafizə xidmətinin rəisi Orxan Əsgərovu qətlə yetirib. Səfirliyin mühafizə xidmətinin iki əməkdaşı - Vasif Tağıyev və Mahir İmanov hücumun qarşısını alarkən yaralanıblar.

Orxan Əsgərovun atası: "İran tərəfi təklif etdi ki, edam kəndirini mən çəkim"

Mərahim Nəsib