Övladı üçün təkbaşına çırpınan ana yardım istəyir: "Artıq bacara bilmirəm"

On bir yaşlı Nurayın yardımsevər şəxslərin dəstəyinə ehtiyacı var.

Bu barədə Oxu.Az-a onun anası Səbinə Salahova məlumat verib.

O bildirib ki, övladı serebral iflic və ürək xəstəliklərindən əziyyət çəkir:

"Nurayın on bir yaşı var. O doğularkən həkimin əlindən düşdüyü üçün beyni zədələnib və iflic keçirib. Beyin tam işləmədiyi üçün bağırsağa siqnal ötürə bilmir. Buna görə də onun qarnı şişir, halı pisləşir. Əvvəl bu problemi müəyyən dərmanlarla həll etsək də, hazırda o dərman belə Nuraya xeyir etmir. Qarın şişdikcə dəhşətli ağrı verir. Uşağın ağlamaqdan gözləri şişir. Nurayın ürəyində yırtıq olduğu üçün o, Türkiyədə ağır ürək əməliyyatı keçirib".

Gənc ana övladının müalicəsi üçün dəstək istəyib:

"Nuray dəfələrlə sizin saytın izləyicilərinin dəstəyi ilə Türkiyədə müayinəyə gedib. Nurayın dərmanları gecikdikcə, vəziyyəti ağırlaşır. Nurayı Türkiyəyə aparmağa imkanımız olmadığı üçün həkim telefon vasitəsilə nə dərmanlar almalı olduğumuzu deyir, sifariş edirik. Hazırda Nuraya dərman sifariş etməliyəm, reabilitasiyalara başlamalıyam. Nuray reabilitasiyalara gedən zaman heç olmasa əlimdən tutaraq yeriyə bilir. Reabilitasiya dayanan kimi, qızım tamamilə hərəkət qabiliyyətini itirir. İnanın, artıq Nurayı qucağımda daşımağa gücüm də çatmır. Mənim üç övladım var. Əvvəl günü 10-15 manata yuxa yayırdım. İndi səhhətim buna da imkan vermir. İnanın, həkim dərmanlar yazıb, almıram ki, əsas Nurayı müalicə edə bilim. Anamın 78 yaşı var, əvvəl mənə dəstək olmaq üçün yollarda limon və gül satırdı. İndi onun da səhhəti pis olduğu üçün işləyə bilmir. Nurayın pensiyası ilə dolanmağa çalışırıq. Hazırda dərmanları sifariş etmək və reabilitasiyalara başlamaq üçün 1 500 manata ehtiyacımız var. Yardımsevər şəxslərdən bizə yenidən dəstək olmalarını xahiş edirik".

Ailə ilə əlaqə: (077) 325-61-47.

"Kapital Bank": 4169 7388 2994 1768.

Övladı üçün təkbaşına çırpınan ana yardım istəyir: "Artıq bacara bilmirəm"