NİİM: Bakıda bəzi yollarda avtomobillərin hərəkət sürəti aşağı düşüb

Hazırda paytaxtın əksər küçə və prospektlərində yaranan nəqliyyat sıxlığının müddəti və sıxlıq olan yolların sayı artıb.

Oxu.Az xəbər verir ki, bu barədə Daxili İşlər Nazirliyinin Nəqliyyatı İntellektual İdarəetmə Mərkəzi (NİİM) məlumat yayıb.

Bildirilib ki, müşahidə kameralarının görüntülərinə, aparılan təhlillərə əsasən, buna səbəb kimi pik və qeyri-pik saatlarda bayramlarla əlaqədar şəhərin mərkəzi hissəsinə nəqliyyat vasitələrinin daha çox axın etməsi, bəzi ictimai-iaşə obyektlərinin, gül mağazalarının qarşısında, dayanma və durmanın qadağan edildiyi nişanın təsir zonasında avtomobillərin park edilməsi göstərilə bilər:

"Yol-nəqliyyat hadisələrinin baş verməsi, texniki nasaz avtomobillərin yolda qalması da bu səbəblər siyahısındadır. Qeyd edilən məlumatlar NİİM-in əməkdaşları tərəfindən və xüsusi proqramlar əsasında aparılan təhlillərə və faktlara əsaslanır.

Pik saatlarda ötən ayın əvvəlindən bu günə nəqliyyat vasitələrinin hərəkət sürətinin azalması (km/saat)

1. Koroğlu Rəhimov küçəsində 11-dən 8-ə;

2. 28 May küçəsində 12-dən 11-ə;

3. Tbilisi prospektində 17-dən 11-ə;

4. Heydər Əliyev prospektində (köməkçi yol) 18-dən 11-ə;

5. Rəşid Behbudov küçəsində 14-dən 12-yə;

6. Bülbül prospektində 18-dən 15-ə;

7. Neftçilər prospektində 30-dan 16-ya;

8. Zərifə Əliyeva küçəsində 23-dən 20-ə;

9. Xətai prospektində 27 -dən 20-yə;

10. Ziya Bünyadov prospektində 49-dan 24-ə;

11. 8 Noyabr prospektində 42-dən 26-ya;

12. Yusif Səfərov küçəsində 46-dan 30-a;

13. Qara Qarayev prospektində 43-dən 34-ə;

14. Səməd Vurğun küçəsində 45-dən 37-yə;

15. Babək prospektində 50-dən 40-a.

Bir daha bildirmək istəyirik ki, yollarda bu səbəblərdən bir avtomobilin yolun hərəkət zolağında park edilməsi və ya dayanması, nəqliyyat intensivliyinin aşağı düşməsinə gətirib çıxarır. Bu da mərkəzlə yanaşı, digər yollara da təsir edir".

"NİİM tərəfindən nəqliyyat intensivliyini artırmaq üçün hazırda 40-dan çox küçə və prospektdə işıqforlara "yaşıl dalğa" əmri verilir, kamera görüntüləri əsasında problemli kəsişmələrə əlavə naryadların cəlb olunması məqsədilə yol polisi ilə birgə tədbirlər görülür", - deyə məlumatda qeyd olunub.