"Piyada keçidində hərəkət edən şəxsə zolaqlardan birində avtomobil yol verir. Lakin piyada digər hərəkət zolağındakı vəziyyətə kifayət qədər diqqət yetirmədən, qaçaraq yolu keçməyə davam edir və həmin zolaqla hərəkət edən avtomobillə toqquşur".
Oxu.Az xəbər verir ki, bu barədə Baş Dövlət Yol Polisi İdarəsinin (BDYPİ) Hərəkətin Təhlükəsizliyinin Təbliği Şöbəsinin rəisi, polis polkovnik-leytenantı Rövşən Tağıyev paylaşım edib.
O bildirib ki, həmin hadisənin görüntülərində əks olunan vəziyyət yol hərəkətində bir anlıq tələskənliyin nə qədər ciddi təhlükə yarada biləcəyini göstərir.
Belə ki, piyada keçidi piyadaya yolu keçmək üçün üstünlük versə də, bu üstünlük təhlükəsizlik tədbirlərini aradan qaldırmır. Yolun bir zolağında avtomobilin dayanması digər zolaqda hərəkətin də dayandığı anlamına gəlmir.
Rövşən Tağıyev qeyd edib ki, xüsusilə çoxzolaqlı yollarda piyadalar hər bir hərəkət zolağına daxil olmamışdan əvvəl yaxınlaşan nəqliyyat vasitələrinin sürətini və məsafəsini düzgün qiymətləndirməli, sürücünün onları gördüyünə əmin olmalı və yolu qaçaraq keçməkdən çəkinməlidirlər:
"Bu cür vəziyyətlər sürücülər üçün də mühüm xəbərdarlıqdır. Piyada keçidinə yaxınlaşarkən qonşu zolaqdakı avtomobilin sürəti azaltması və ya dayanması təsadüfi hal kimi qəbul edilməməlidir. Həmin nəqliyyat vasitəsinin qarşısından görünməyən piyada çıxa biləcəyi ehtimalı hər zaman nəzərə alınmalı, sürət buna uyğun seçilməlidir. Yol hərəkətində üstünlük hüququ təhlükəni avtomatik aradan qaldırmır. İstər sürücü, istərsə də piyada üçün əsas məqsəd kimin haqlı olduğunu sübut etmək deyil, təhlükəli vəziyyətin ümumiyyətlə yaranmasına imkan verməməkdir. Bir neçə saniyə gözləmək, ətrafa bir daha baxmaq və qarşı tərəfin sizi gördüyünə əmin olmaq bəzən ağır nəticələrin qarşısını ala bilər".
