Azərbaycanda qadın və kişilərin təhsil səviyyəsi yaş qrupları üzrə fərqliliklər göstərir.
Oxu.Az xəbər verir ki, bu barədə statistik göstəricilər Dövlət Statistika Komitəsinin məlumatında yer alıb.
Qeyd olunub ki, 2019-cu il əhalinin siyahıyaalınmasının məlumatlarına əsaslanan statistik göstəricilərə görə, həm 20-54 yaş, həm də 55 yaş və yuxarı qruplarda tam orta təhsil üstünlük təşkil edir.
20-54 yaş qrupunda qadınların 60.4 faizi, kişilərin isə 60.7 faizi tam orta təhsillidir. Ali təhsil səviyyəsində isə kişilərin göstəricisi 18.1 faiz, qadınların göstəricisi 16 faizdir.
Peşə təhsili üzrə qadınların göstəricisi 4.6 faiz, kişilərin göstəricisi 5.8 faiz təşkil edir. Orta ixtisas təhsili alan qadınların payı 10.7 faiz, kişilərin payı isə 8.3 faizdir.
55 yaş və yuxarı əhali qrupunda da tam orta təhsil ən geniş yayılmış səviyyədir. Bu yaş qrupunda qadınların 54.1 faizi, kişilərin 52.8 faizi tam orta təhsillidir.
Ali təhsil səviyyəsində isə kişilərin payı 20.9 faiz, qadınların payı 15.9 faizdir. Orta ixtisas təhsili üzrə göstəricilər qadınlarda 10.6 faiz, kişilərdə isə 10.6 faiz təşkil edir.
İbtidai təhsil səviyyəsində 20-54 yaş qrupunda qadınların və kişilərin göstəriciləri eyni - 1.2 faizdir. 55 yaş və yuxarı qrupda isə bu göstərici qadınlarda 4.1 faiz, kişilərdə 2 faizdir.
Ümumilikdə, təqdim olunan statistik məlumatlar göstərir ki, hər iki yaş qrupunda kişilərin ali təhsil göstəricisi qadınlarla müqayisədə daha yüksəkdir. Bununla yanaşı, 55 yaş və yuxarı qrupda qadınların tam orta təhsil göstəricisi kişilərdən bir qədər çoxdur.
