Noyabrın 17-də rəqəmsal apokalipsisin - qlobal fəlakətin baş verəcəyi ilə bağlı iddialar yayılıb.
Xarici mediadakı məlumatlarda həmin gün hakerlərin dünyanın bank sistemlərinə hücum edəcəyi, hesabları sıfırlayacağı və interneti üç ay müddətinə sıradan çıxaracağı qeyd olunub. Bu səbəbdən bəzi istifadəçilərin nağd pul, ərzaq və digər ehtiyatlar toplamağa başladığı bildirilib.
Maraqlıdır, Azərbaycanı hansısa təhlükə gözləyirmi?
Məsələ ilə bağlı Milli Kibertəhlükəsizlik Agentliyindən (MKA) Oxu.Az-ın sorğusuna cavab olaraq bildirilib ki, qurum hər zaman olduğu kimi, gücləndirilmiş iş rejimində fəaliyyət göstərir:
"Bu, məhz noyabrın 17-si ilə bağlı tətbiq olunan xüsusi rejim deyil. İşlər əvvəlki qaydada davam edir və bütün proseslər 7/24 nəzarət altındadır. Hər hansı insident və ya müdaxilə baş verərsə, onun aradan qaldırılması, müvafiq tədbirlərin görülməsi təmin olunacaq".