Günlərdir davam edən yağıntılı hava şəraitindən sonra Sabunçu rayonu, Ramana qəsəbəsində yol yararsız vəziyyətə düşüb.
Bu barədə Oxu.Az-ın qaynar xəttinə (+994 55 224-12-12) müraciət daxil olub.
Sakinlərin sözlərinə görə, Ramana qəsəbəsinin Rəsul Rza küçəsində yağışdan sonra yolda yaranan palçıq nəticəsində ərazidə hərəkət çətinləşib və onlar üçün ciddi narahatlıq yaranıb.
Məsələ ilə bağlı Oxu.Az-ın sorğusuna cavab olaraq Sabunçu Rayon İcra Hakimiyyəti başçısının köməkçisi Müslüm Mahmudov bildirib ki, problemin aradan qaldırılması ilə bağlı aidiyyəti quruma müraciət edilib:
"Rayonun bütün qəsəbələrində olduğu kimi, Ramanada da qəsəbədaxili yolların asfaltlanması mərkəzləşmiş qaydada Azərbaycan Avtomobil Yolları Dövlət Agentliyi tərəfindən Dövlət İnvestisiya Proqramları çərçivəsində həyata keçirilir. Ramana qəsəbəsi, Rəsul Rza küçəsində də yolların təmiri ilə bağlı tədbirlərin bu proqrama əlavə edilməsi üçün Rayon İcra Hakimiyyəti tərəfindən aidiyyəti üzrə məktubla müraciət olunub".
