Rusiya Baş Prokurorluğu nüfuzlu azərbaycanlı iş adamı Şahlar Novruzova məxsus olan "Tuapse Dəniz Ticarət Limanı" MMC-nin dövlət mülkiyyətinə qaytarılmasını tələb edib.
Oxu.Az-ın lenta.ru-ya istinadla verdiyi məlumata görə, iddia Krasnodar diyarı Arbitraj Məhkəməsi tərəfindən icraata qəbul edilib.
Nəzarət orqanı hesab edir ki, leqallaşdırma məqsədilə həyata keçirilən əməliyyatlar nəticəsində strateji obyekt dəfələrlə sahiblərini dəyişdirib. Son sahibi isə Britaniyanın Virgin adalarında qeydiyyatda olan xarici ofşor şirkəti çıxıb.
Qeyd edək ki, Novruzov Rusiyanın Kuban vilayətindəki Azərbaycan diasporunun tanınmış nümayəndələrindən biri və Krasnodardakı "Köhnə Bakı" restoranının sahibidir. O, 2025-ci ilin sentyabrında irimiqyaslı dələduzluq cəhdində şübhəli şəxs kimi saxlanılıb. 60 yaşlı biznesmen 919 milyon rubl (təqribən 19 milyon 300 min manat - red.) dəyərində aktivləri olan şirkətin paylarını ələ keçirməyə cəhddə ittiham olunur. İstintaq hesab edir ki, cinayəti törətmək üçün aralarında Novruzovun da olduğu cinayətkarlar Prikubansk Rayon Məhkəməsinə guya Azərbaycanda bağlanmış saxta nikah şəhadətnaməsi təqdim ediblər. Hüquq-mühafizə orqanlarının məlumatına görə, cinayətkarların aktivləri ələ keçirmək üçün məhkəməyə təqdim etdikləri sənədin saxta olduğu üzə çıxıb.
Novruzov hazırda istintaq təcridxanasındadır. İlkin hazırlıq iclası oktyabrın 17-nə təyin olunub.
