Sabirabadda avtoqəzada dörd nəfər xəsarət alıb.
Oxu.Az "Report"a istinadən xəbər verir ki, hadisə Hacıqabul-Bəhrəmtəpə-Mincivan avtomobil yolunun Sabirabad rayonu ərazisindən keçən hissəsində qeydə alınıb.
Qəza zamanı KIA və "Opel" markalı minik avtomobilləri toqquşub.
Xəsarət alan dörd nəfər Şirvan Şəhər Mərkəzi Xəstəxanasına (ŞMX) yerləşdirilib.
Məlumata görə, Sabirabad rayonu ərazisində baş verən yol-nəqliyyat hadisəsi səbəbi ilə xəsarət alan dörd nəfər avqustun 17-də saat 14:50-də Şirvan ŞMX-nin Təcili tibbi yardım şöbəsinə hospitalizasiya olunub. Onlara bədənin müxtəlif nahiyələrinin çox sayda travması diaqnozu təyin edilib.
Xəsarət alan üç nəfərə zəruri tibbi yardım göstərilib və onlar ambulator müalicə üçün evə buraxılıblar. Hazırda bir nəfərin instrumental diaqnostik müayinələri davam etdirilir.
Faktla bağlı araşdırma aparılır.
