Sabirabad rayonunda həyat yoldaşı ilə barışmaq istəyən kişi həbs edilib.
Oxu.Az Teleqraf.com-a istinadla xəbər verir ki, 1989-cu il təvəllüdlü Sahib Vəliyev (adı və soyadı şərtidir) keçmiş həyat yoldaşı Nailənin işlədiyi mağazanın qarşısına gəlib.
O, keçmiş arvadı ilə ailə münasibətlərini bərpa etməyə çalışıb. Lakin Nailə onunla barışmayıb və baş verə biləcək insidentin qarşısını almaq məqsədilə polisə müraciət edib.
Hadisə yerinə gələn polis əməkdaşlarını görən təqsirləndirilən şəxs əsəb gərginliyi keçirib. Bu səbəbdən ictimai yerdə nalayiq ifadələr işlədib və polisin qanuni tələblərinə tabe olmayıb.
Onun barəsində İnzibati Xətalar Məcəlləsinin 510-cu (xırda xuliqanlıq) və 535.1-ci (polisin qanuni tələbinə tabe olmama) maddələri ilə inzibati xəta protokolu tərtib olunub.
Sabirabad Rayon Məhkəməsinin qərarı ilə təqsirləndirilən şəxs 10 gün müddətində inzibati qaydada həbs edilib.
