Paytaxtın Sabunçu rayonunun Əmir Bağırov küçəsində yerləşən həyətin qanunsuz satılması, sənədsiz tikinti işlərinin aparılması və ağacların kəsilməsinə dair sakinlərin şikayətləri ilə bağlı polis hərəkətə keçib.
Daxili İşlər Nazirliyinin Mətbuat Xidmətinin əməkdaşı Cəsarət Qənbərli Oxu.Az-ın sorğusuna cavab olaraq bildirib ki, qeyd edilən ünvanda yaşayan sakinlərin iddiaları üzrə polis əməkdaşları tərəfindən prosessual araşdırmalar aparılır.
Məlumatda qeyd olunub ki, araşdırmanın nəticəsinə uyğun olaraq hüquqi tədbirlər görüləcək.
Məhərrəm Əliyev
Paytaxtın Sabunçu rayonu, Əmir Bağırov küçəsində yaşayan sakinlər Baku TV-yə iddia ediblər ki, əvvəllər ukraynalı bir qadına məxsus olan həyət qanunsuz şəkildə satılıb və ərazidə ardıcıl olaraq sənədsiz evlər tikilib.
Onların sözlərinə görə, ərazidəki ağaclar da icazəsiz kəsilib. Bildirilib ki, tikinti işlərinə dəfələrlə müdaxilə olunsa da, proses sonradan yenidən davam etdirilib.
"Mərhumun qızının dediklərinə görə, ərazi ondan icazəsiz satılıb, yəni vərəsə odur. Maklerlər ərazini qanunsuz ələ keçirərək tikinti aparırlar. Aidiyyəti qurumlar dəfələrlə söküntü işləri həyata keçirsə də, yenə də tikintini davam etdirirlər. Bir neçə gün əvvəl gəlib qapımızı sındırmağa çalışır, bizi təhqir edirdilər. Hədə-qorxu gələrək "sizi burada yaşatmayacağıq" deyirdilər", - sakinlərdən biri söyləyib.
Digər bir vətəndaş isə qeyd edib: "10 gün əvvəl qadın bir makler gəlib qapımı döydü, hədə-qorxu gəldi, söyüş söydü. Qapını açmadım. Biz deyirik ki, tiksinlər, amma bunu qanuni yolla etsinlər, həyətimizi daraltmasınlar".
Məsələ ilə bağlı Fövqəladə Hallar Nazirliyindən bildirilib ki, Əmir Bağırov küçəsində aparılan tikinti işləri ilə bağlı fevralın 6-da vətəndaş müraciəti əsasında Tikintidə Təhlükəsizliyə Nəzarət Dövlət Agentliyinin əməkdaşları tərəfindən əraziyə baxış keçirilib. Qeyd olunan ərazidə yolu məhdudlaşdıracaq tikinti işlərinin aparılmaması üçün müvafiq nəzarətin təmin edilməsi məqsədilə yerli icra hakimiyyətinə rəsmi məktub ünvanlanıb.
Ərazidəki ağacların qanunsuz kəsilməsi iddiası ilə bağlı isə Ekologiya və Təbii Sərvətlər Nazirliyindən qeyd olunub ki, araşdırma zamanı sözügedən ünvanda daş və dəmir lövhələrlə hasarlanmış ərazidə ağac və kol bitkilərinin kəsildiyi müəyyən edilib. Təqsirkar şəxslərin müəyyənləşdirilməsi və barələrində qanunvericiliyə uyğun tədbirlərin görülməsi istiqamətində hüquq-mühafizə orqanları ilə birgə araşdırma aparılır.
