Sabunçu rayonu Zabrat-1 qəsəbəsində küçənin işıqlandırılmasında yaranan problem sakinlərin narahatlığına səbəb olub.
Bununla bağlı Oxu.Az-ın qaynar xəttinə şikayət daxil olub.
Qeyd edilib ki, qəsəbənin əsas yolunda artıq bir neçə gündür küçə lampaları işləmir.
Vurğulanıb ki, edilən çoxsaylı şikayətlərdən sonra müvafiq xidmət əməkdaşları əraziyə gəlsələr də işıqlandırmanı yalnız qismən bərpa ediblər. Ən təhlükəli hissə hesab olunan mini-marketin yanı və 118 nömrəli avtobusun döndüyü kəsişmə isə axşamlar tamamilə qaranlıq vəziyyətdə qalmaqdadır.
"Həmin ərazi həm avtomobillərin, həm də sərnişin avtobuslarının intensiv hərəkət etdiyi təhlükəli döngələrdən biridir. Axşam saatlarında yol zülmət qaranlıq olduğu üçün həm piyadalar, həm sürücülər üçün ciddi qəza riski yaranır", - deyə şikayətdə bildirilir.
Oxu.Az-ın sorğusuna cavab olaraq Sabunçu Rayon İcra Hakimiyyətindən fakt təsdiqlənib.
"Zabrat qəsəbəsi, Vidadi küçəsində yerləşən 2180 nömrəli paylayıcı qurğunun zədələnməsi səbəbindən küçə işıqlarının verilməsində müvəqqəti olaraq fasilələr yaranıb. Təmir işləri yekunlaşdıqdan sonra küçə işıqlarının verilməsində yaranmış fasilələr aradan qaldırılacaq", - deyə məlumatda bildirilir.
