Xətaidə baş verən güclü yanğın tam söndürüldü

Bakı şəhəri, Xətai rayonu, Süleyman Əhmədov küçəsindəki boya istehsalı sexində baş vermiş yanğın, mürəkkəbliyinə baxmayaraq, Fövqəladə Hallar Nazirliyinin qüvvələrinin peşəkar fəaliyyəti sayəsində genişlənərək ətraf ərazilərə, o cümlədən yanğının perimetri boyu yerləşən obyektlərə keçməsinə imkan verilmədən tam söndürülüb.

Xətaidə baş verən güclü yanğın tam söndürüldü

Bu barədə Oxu.Az-a FHN-in Mətbuat Xidmətindən bildirilib.

15:49

Bakı şəhər, Xətai rayonu, NZS qəsəbəsi, S.Əhmədov küçəsində baş verən yanğın nəticəsində bir nəfər xəsarət alıb.

Bu barədə Oxu.Az Kliniki Tibbi Mərkəzin Mətbuat Xidmətinin katibi Ruzbeh Məmməd bildirib.

Onun sözlərinə görə, qadın cinsli həmin şəxs tüstüdən zəhərlənmə diaqnozu ilə KTM-in Təcili və Təxirəsalınmaz Tibbi Yardım şöbəsinə qəbul olunub.

"Xəstəyə zəruri ilkin tibbi yardım xidmətləri göstərilir, vəziyyəti orta-ağırdır".

15:47

Xətai rayonu, Süleyman Əhmədov küçəsində baş verən yanğın səbəbindən 8 Noyabr prospektindən qeyd olunan küçə istiqamətində nəqliyyat vasitələrinin hərəkətinə qoyulan məhdudiyyət aradan qaldırılıb.

Oxu.Az xəbər verir ki, bu barədə Daxili İşlər Nazirliyi məlumat yayıb.

15:44

"Saat 13:32-də Xətai rayonu, Süleyman Əhmədov küçəsindəki boya sexində yanğın hadisəsi baş verməsi ilə bağlı Fövqəladə Hallar Nazirliyinin "112" qaynar xəttinə məlumat daxil olub".

Oxu.Az xəbər verir ki, bunu Dövlət Yanğından Mühafizə Xidmətinin rəis müavini, polkovnik Taleh Babayev jurnalistlərə açıqlamasında deyib.

"Dərhal hadisə yerinə Dövlət Yanğından Mühafizə Xidmətinin eləcə də Xüsusi Xilas etmə Xidmətinin qüvvələri cəlb olunub. 4 dəqiqə ərzində qüvvələr hadisə yerinə çatıb və yanğının söndürülməsinə müdaxilə edib.

Təxminən 3 500 kvadratmetr ərazidə yerləşən boya sexinin boya çənləri, qatqı materialları, eyni zamanda plastik qablarda yanğın hadisəsi baş verib.

Yanğının söndürülməsinə qısa bir zamanda nail olunub. Yanğının tam söndürülmə işləri tamamlanır", - deyə T.Babayev vurğulayıb.

15:34

"Dövlət Yanğından Mühafizə Xidmətinin 12 yanğınsöndürmə avtomobili yanğın yerinə cəlb olunub. Hazırda yanğının tam söndürülməsi işləri davam edir".

Oxu.Az xəbər verir ki, bunu Dövlət Yanğından Mühafizə Xidmətinin rəis müavini, polkovnik Taleh Babayev jurnalistlərə açıqlamasında deyib.

Əzizə İsmayılova

14:54

Fövqəladə Hallar Nazirliyi tərəfindən həyata keçirilmiş zəruri və təxirəsalınmaz tədbirlər sayəsində Bakı şəhəri, Xətai rayonu, Süleyman Əhmədov küçəsində yerləşən boya istehsalı sexində baş vermiş yanğın ətraf ərazilərə yayılmasına imkan verilmədən məhdudlaşdırılıb.

Oxu.Az bildirir ki, bu barədə FHN-in Mətbuat Xidmətinin məlumatında deyilir.

Hazırda yanğının tam söndürülməsi istiqamətində tədbirlər davam etdirilir.

Əlavə məlumat veriləcək.

Baku TV hadisə yerindən canlı bağlantıya qoşulub:

Xətaidə baş verən güclü yanğın tam söndürüldü

14:45

"Xətai rayonu ərazisində baş verən yanğınla bağlı Ekologiya və Təbii Sərvətlər Nazirliyinin əməkdaşları hazırda ərazidə monitorinq işləri aparırlar".

Bunu Oxu.Az-a Dövlət Ekoloji Təhlükəsizlik Xidmətinin rəsmisi Qafar Ağayev bildirib.

O qeyd edib ki, havaya yayılan qara tüstü axını ilə bağlı havanın çirklənmə səviyyəsini müəyyən etmək məqsədilə mütəxəssislər tərəfindən atmosfer havasından xüsusi cihazlarla nümunələr götürülür.

14:27

Fövqəladə Hallar Nazirliyinin "112" qaynar telefon xəttinə Bakı şəhəri, Xətai rayonu, S.Əhmədov küçəsi yaxınlığında obyektdə yanğın baş verməsi barədə daxil olmuş məlumat əsasında dərhal əraziyə Nazirliyin Dövlət Yanğından Mühafizə Xidməti, Xüsusi Riskli Xilasetmə Xidməti və Bakı Regional Mərkəzinin qüvvələri cəlb olunub.

Oxu.Az-a FHN-in Mətbuat Xidmətindən bildirilib ki, hazırda yanğınla mübarizə tədbirləri davam etdirilir. Əlavə məlumat veriləcək.

Xətaidə baş verən güclü yanğın tam söndürüldü

14:17

"Bu gün saat 13:30 radələrində Respublika Təcili və Təxirəsalınmaz Tibbi Yardım Mərkəzinə Bakı şəhəri, Xətai rayonu, NZS qəsəbəsi, S.Əhmədov küçəsində yanğın baş verməsi səbəbi ilə çağırış daxil olub".

Bu barədə Oxu.Az-a TƏBİB-dən bildirilib.

Qeyd olunub ki, hadisə yerinə altı təcili tibbi yardım briqadası cəlb edilib.

Qeyd olunub ki, indiyədək hadisə ilə əlaqədar təcili tibbi yardım xidmətinə müraciət qeydə alınmayıb.

14:09

"Xəzər" TV-də təxliyə işləri həyata keçirilir.

Oxu.Az-ın əldə etdiyi məlumata görə, təxliyə televiziyanın yaxınlığındakı boya sexində partlayış təhlükəsi riskinə görə həyata keçirilir.

@oxuaz 🚨🚨🚨 Yanğın baş vermiş ərazidən insanların təxliyə edilməsinin görüntüləri. #yanğınhadisəsi ♬ оригинальный звук - Oxu.az Son Xəbərlər

Aytac Qasımova

14:01

Xətai rayonu, Süleyman Əhmədov küçəsində baş verən yanğın səbəbindən hazırda 8 Noyabr prospektindən mərkəz istiqamətində sıxlıq yaranıb.

Oxu.Az bildirir ki, bu barədə Daxili İşlər Nazirliyi Nəqliyyatı İntellektual İdarəetmə Mərkəzindən verilən məlumatda deyilir.

Qeyd olunur ki, nəqliyyat vasitələrinin rahat hərəkətini təmin etmək məqsədilə yol polisi ilə birlikdə tədbirlər görülür.

13:56

"Yanğın Xəzər TV-nin arxasındakı ərazidə baş verib".

Bunu Oxu.Az-ın sorğusuna cavab olaraq Fövqəladə Hallar Nazirliyinin (FHN) Mətbuat Xidmətindən bildiriblər.

"Yanan obyektin nə olduğu barədə dəqiq məlumatımız yoxdur. Hazırda ərazidə yanğınsöndürmə işləri davam edir. Əlavə məlumat veriləcək", - deyə açıqlamada bildirilir.

Əzizə İsmayılova

13:51

Xətai rayonu, Süleyman Əhmədov küçəsində baş vermiş yanğınla əlaqədar polis əməkdaşları hadisə yerinə cəlb ediliblər.

Oxu.Az bildirir ki, bu barədə Daxili İşlər Nazirliyinin Mətbuat Xidmətindən bildirilib.

Qeyd olunub ki, yanğın səbəbindən 8 Noyabr prospektindən qeyd olunan küçə istiqamətində nəqliyyat vasitələrinin hərəkətinə məhdudiyyət tətbiq edilib.

Hazırda polis əməkdaşları tərəfindən hadisə yeri mühafizə edilərək təhlükəsizlik tədbirləri görülür.

13:48

Bakıda yanğın hadisəsi başlayıb.

Oxu.Az-ın məlumatına görə, hadisə Xətai rayonu, NZS qəsəbəsində qeydə alınıb.

Hadisə ilə bağlı Fövqəladə Hallar Nazirliyinə sorğu verilib.

Əzizə İsmayılova