Bakının Xətai rayonunda yerləşən yaşayış binalarından birində liftin uzun illərdir yararsız vəziyyətdə qalması sakinlərin narazılığına səbəb olub.
Bununla bağlı Oxu.Az-ın qaynar xəttinə müraciət daxil olub.
Bildirilib ki, Xətai rayonu, 823-cü keçid, Xaliq Əzizzadə küçəsi, bina 4-ün 6-cı blokunda yerləşən lift uzun müddətdir istismara yararsız vəziyyətdədir və sakinlər gündəlik ciddi çətinliklərlə üzləşirlər.
Sakinlərin sözlərinə görə, təxminən beş ildir aidiyyəti qurumlar tərəfindən liftin yenilənəcəyi vəd edilsə də, ötən müddət ərzində heç bir real tədbir görülməyib.
Oxu.Az-ın sorğusuna cavab olaraq Xətai Rayon İcra Hakimiyyətindən (RİH) fakt təsdiqlənib.
Bildirilib ki, sözügedən problemdən xəbərdardırlar.
"Sıradan çıxan liftlər hissə-hissə bərpa edilir. Bu binanın liftinin bərpa olunması məsələsi artıq müvafiq plana daxil edilib və ilin sonuna kimi problem həllini tapacaq", - deyə məlumatda vurğulanıb.
