Zaqatala-Bakı avtobusunun qəzası nəticəsində xəsarət alan şəxslər evə buraxılıblar

Zaqatala-Bakı marşrutu üzrə hərəkət edən avtobus bu gecə saat 3-də qəzaya düşüb.

Bu məlumat Oxu.Az-ın sorğusuna cavab olaraq baş Dövlət Yol Polisi İdarəsindən verilib.

"Xaldan-Şəki-Zaqatala yolunun Yevlax rayonunun Xanabad kəndindən keçən 9-cu kilometrliyində Bakı şəhər sakini Bəşarət Qocayevin idarə etdiyi "Mercedes" markalı avtobus idarəetməsini itirdiyi üçün onu aşırıb. Faktla bağlı araşdırma aparılır", - deyə məlumatda bildirilir.

Oxu.Az-ın əldə etdiyi məlumata görə, hadisənin baş verməsinə səbəb yolda təmir işlərinin aparılması olub. Belə ki, yol şəraitini düzgün qiymətləndirə bilməyən sürücü nəqliyyat vasitəsini yol kənarında park etmək istəyərkən onu aşırıb.

Tibbi Ərazi Bölmələrini İdarəetmə Birliyindən (TƏBİB) isə Oxu.Az-ın sorğusuna cavab olaraq bildirilib ki, aprelin 16-sı gecə saatlarında baş verən yol-nəqliyyat hadisəsi nəticəsində xəsarət alan səkkiz nəfər (beş qadın, üç kişi) Şəki Rayon Mərkəzi Xəstəxanasının təcili və təxirəsalınmaz tibbi yardım şöbəsinə hospitalizasiya olunub.

"Hər bir şəxsə ilkin tibbi yardım göstərilib. Vəziyyətləri qənaətbəxş qiymətləndirilən şəxslər ambulator müalicə üçün evə buraxılıblar", - deyə məlumatda vurğulanıb.

Əzizə İsmayılova

09:48

Zaqatala-Bakı marşrutu üzrə hərəkət edən avtobus qəzaya düşüb.

Oxu.Az APA-ya istinadla xəbər verir ki, hadisə gecə saatlarında Yevlax-Zaqatala-Gürcüstan sərhəd magistral avtomobil yolunun Yevlax rayonu Xanabad kəndi ərazisindən keçən hissəsində baş verib.

Qəza zamanı avtobusda xəsarət alan səkkiz nəfər sərnişin Şəki Rayon Mərkəzi Xəstəxanasının (RMX) Təcili Tibbi Yardım Şöbəsinə aparılıblar.

Xəsarət alan şəxslər aşağıdakılardır:

1988-ci il təvəllüdlü Zaqatala rayonu, Bəhmətli kənd sakini Şirinbəyova Rəqsanə Şahmalı qızı;

1960-cı il təvəllüdlü Zaqatala rayonu, Yeni Suvagil kənd sakini Məmmədova Leysanat İbad qızı;

Zaqatala rayonu, Əliabad qəsəbə sakini Adilova Həlimə Ağabala qızı;

1967-ci il təvəllüdlü Zaqatala rayon sakini Əliyev Qüdrət Abdulla oğlu;

2004-cü il təvəllüdlü Zaqatala rayonu, Aşağı Tala kənd sakini Ramazanzadə Aysel Adil qızı;

1969-cu il təvəllüdlü Zaqatala rayonu, Yeni Suvagil kənd sakini Babayeva Kifayət Hüseyn qızı;

1993-cü il təvəllüdlü Zaqatala rayonu, Yeni Suvagil kənd sakini Babayev İlkin Yusif oğlu;

1983-cü il təvəllüdlü Zaqatala rayonu, Yeni Suvagil kənd sakini Məmmədova Aygün Osman qızı.

Xəstəxanaya daxil olan şəxslərin hamısına lazımi ilkin tibbi yardım göstərilib, xəsarətləri yüngül olduğu üçün ambulator müalicə almaq şərti ilə evə buraxılıblar.

Faktla bağlı araşdırma aparılır.