26 avqust Laçın şəhəri günü münasibətilə yeni maraqlı layihə təqdim edilib. "Zerti" Aqrosənaye Parkında regionda ilk dəfə böyük alış-veriş məkanı - "Laçın həftə bazarı" fəaliyyətə başladı.
Layihənin əhəmiyyəti ondan ibarətdir ki, Laçın işğaldan azad olunandan sonra yaylaqlara köçən, orada orqanik keyfiyyətli məhsul istehsal edən fermerlərə dəstək məqsədilə nümunəvi bazar modeli yaradılsın. Çünki məhsul istehsal edən kəndli çox zaman alıcıyla birbaşa əlaqə qurmaqda çətinlik çəkir. Həftə bazarı isə imkan verəcək ki, insanlar məhsulu birbaşa istehsalçının özündən alsınlar, heç kəsə əlavə vəsait ödəməsinlər.
Laçın həftə bazarı nəzərdə tutulduğu kimi avqustun 26-da saat 9-da işə başlayıb. Həftə bazarında Bakı Abadlıq Xidmətinin öz təsərrüfatlarından başqa müstəqil fermer təsərrüfatları - bal, süd, ət, balıq məhsulları istehsalçıları da həvəslə piştaxta arxasına keçiblər. Bu haqda əvvəlcədən sosial şəbəkələrdə geniş məlumat verildiyinə görə, laçınlılar və ətraf bölgədə yaşayan yerli əhali böyük maraqla bazara gəliblər. Əsl Şərq bazarında təqdim olunan hər məhsul keyfiyyətli və təzədir.
Bazarın ilk günü Azərbaycan Prezidentinin Laçın rayonundakı xüsusi nümayəndəsi Məsim Məmmədov, Bakı Abadlıq Xidmətinin və Laçın Abadlıq Xidmətinin rəhbərliyi, həmçinin şəhər günü münasibətilə Laçına üz tutmuş ziyalılar, şəhərin qonaqları da iştirak ediblər. Bazara gələn hər kəs yerli biznesə dəstək olmağa çalışıb, bazardan heç kim əliboş qayıtmayıb.
Həftəbazarı layihəsinin davamlı olması nəzərdə tutulur. İlk təcrübə göstərdi ki, bazar turistlər üçün də maraqlıdır - səyahətdən geri dönəndə yerli məhsullarla, hədiyyə boxçalarıyla qayıtmağı kim istəməz ki?
