ABŞ-də yüzminlərlə sərnişinin səfərinə təsir edən kütləvi aviasiya sistemləri nasazlığı Federal Aviasiya Administrasiyasının (FAA) köhnəlmiş telekommunikasiya şəbəkəsinin həddindən artıq yüklənməsi nəticəsində baş verib. Buna Arkanzas və Texas ştatlarında yerləşən radar obyektlərindəki marşrutlaşdırıcılar səbəb olub.
Oxu.Az xəbər verir ki, bu barədə "The Wall Street Journal" araşdırma ilə tanış olan mənbələrə istinadən məlumat yayıb.
Nəşrin məlumatına görə, Arkanzasdakı obyektlərdən birində "HPE Juniper Networks" şirkətinin istehsalı olan yeni marşrutlaşdırıcı quraşdırıldıqdan sonra avadanlıq qeyri-adi dərəcədə böyük həcmdə məlumat ötürməyə başlayıb. Texasdakı marşrutlaşdırıcının yaratdığı trafiklə birlikdə bu, ölkə üzrə hava hərəkəti dispetçerlərinin istifadə etdiyi şəbəkənin həddindən artıq yüklənməsinə səbəb olub.
FAA-nın texnologiyalar üzrə direktoru Rebekka Qay bildirib ki, iki obyekt hər 4-5 saniyədən bir təxminən min sorğu göndərib. Nəticədə ABŞ-dəki 22 hava hərəkətinə nəzarət mərkəzindən 17-si nasazlıqdan təsirlənib və uçuşlar müvəqqəti dayandırılıb.
Mütəxəssislər marşrutlaşdırıcıları ümumi şəbəkədən ayırdıqdan sonra rabitənin sabitliyini bərpa etmək mümkün olub. FAA həmçinin məlumatları tələb olunandan daha çox cihaza ötürən geniş yayımlı məlumat ötürmə funksiyasını aşkar edib. Həmin funksiya bütün Juniper marşrutlaşdırıcılarında deaktiv edilib.
Hadisənin dəqiq səbəbi hələ müəyyənləşdirilməyib. FAA rəhbəri Brayan Bedford nasazlığın avadanlığın sıradan çıxması, yaxud onun quraşdırılması və sazlanması zamanı yol verilən səhvlərlə bağlı ola biləcəyini istisna etməyib. HPE şirkəti isə marşrutlaşdırıcıların normal işlədiyini bildirib.
ABŞ-nin nəqliyyat naziri Şon Daffi hadisədə qəsdən müdaxilə əlamətlərinin aşkarlanmadığını açıqlayıb.
