ABŞ-nin Yuta ştatında "Miss Amerikan-Fork" gözəllik müsabiqəsinin qalibi, 21 yaşlı Brinn Karnesekka müəmmalı şəraitdə ölüb.
Oxu.Az xəbər verir ki, bu barədə KTVX məlumat yayıb.
Hadisə barədə gözəllik kraliçasının valideynləri sosial şəbəkələrdə məlumat paylaşıblar.
Onun başına nə iş gəldiyi hələlik ictimaiyyətə məlum deyil. "Miss Amerikan-Fork" və "Miss Yuta" müsabiqələrinin təşkilatçıları baş vermiş hadisə ilə əlaqədar dərin hüznlə başsağlığı veriblər.
Qeyd olunur ki, Karnesekka 2024-cü ildə "Miss Amerikan-Fork" müsabiqəsində birincilik əldə etmişdi. Bu yarışma "Miss Amerika" finalına gedən yolda seçim mərhələlərindən biri hesab olunur. 2025-ci ildə isə o, "Miss Yuta" müsabiqəsinə qatılaraq yalnız ilk "15-lik"də qərarlaşmışdı. Bununla yanaşı, o, fortepianoda klassik musiqi əsərini ifa edərək istedad mükafatını, eləcə də "Miss Konqeniallıq" titulunu əldə edib.
Mərhum Briqam Yanq Universitetində jurnalistika ixtisası üzrə təhsil alırdı və onun məqalələri ştatın bir neçə mətbuat orqanında dərc olunmuşdu. Hazırda polis Karnesekkanın ölümünün səbəblərini açıqlamır, hadisə ilə bağlı araşdırmalar davam etdirilir.
