Beynəlxalq Atom Enerjisi Agentliyi (BAEA) İranda tikilməkdə olan "Darkhoveyn" Atom Elektrik Stansiyasına (AES) gecə saatlarında edildiyi bildirilən hücumla bağlı araşdırmalara başlayıb.
Oxu.Az xəbər verir ki, bu barədə qurumun rəsmi "X" sosial şəbəkə hesabında məlumat yayılıb.
Agentliyin məlumatına görə, hazırda tikintisinin ilkin mərhələsində olan obyektdə sonuncu yoxlama zamanı nüvə materialları aşkar edilməyib. BAEA vurğulayıb ki, ilkin ehtimallara görə, hücum hər hansı radioloji təhlükə yaratmayıb. Bununla yanaşı, qurumun baş direktoru Rafael Qrossi nüvə obyektlərinin yaxınlığında hərbi əməliyyatlardan çəkinməyə çağırıb.
Agentlik İran tərəfi ilə əlaqədə olduğunu və vəziyyəti yaxından izlədiyini bildirib. Yeni məlumatlar daxil olduqca ictimaiyyətə əlavə açıqlamalar veriləcək.
İranın cənub-qərbində tikilməkdə olan "Darxoveyn" Atom Elektrik Stansiyası (AES) iyulun 19-na keçən gecə ABŞ Silahlı Qüvvələrinin zərbələrinə məruz qalıb.
Oxu.Az xəbər verir ki, bu barədə İranın Atom Enerjisi Təşkilatı məlumat yayıb.
Bildirilir ki, ABŞ bazar günü yerli vaxtla saat 03:39-da (Bakı vaxtı ilə 04:09 - red.) tikilməkdə olan "Darxoveyn" Atom Elektrik Stansiyasının ərazisinə bir neçə mərmi ilə zərbə endirib.
İran tərəfi hadisə ilə bağlı əlavə təfərrüat açıqlamayıb.
Xatırladaq ki, ABŞ-İran münaqişəsində növbəti eskalasiya iyulun 8-də başlayıb.
