ABŞ-nin seçilmiş Prezidenti Donald Trampın köməkçilərinin tələbi ilə yanvarın 20-də Dövlət Departamentinin onlarla əməkdaşı istefa verib.
Oxu.Az-ın məlumatına görə, bu barədə "The Washington Post" qəzeti yerli məmurlara istinadən məlumat yayıb.
Qeyd olunur ki, işdən çıxarmalar Tramp komandasının ABŞ-nin gedən prezidenti Co Baydenin administrasiyası ilə əlaqələrinin "qəti şəkildə kəsilməsini" göstərmək məqsədi daşıyır.
Bildirilir ki, diplomatik xidmətin təcrübəli veteranları, o cümlədən 2024-cü ildə ABŞ-nin Ukraynadakı səfiri vəzifəsində çalışmış ABŞ dövlət katibinin enerji resursları üzrə köməkçisi Ceffri Payett, həmçinin siyasi məsələlər üzrə dövlət katibinin müavini vəzifəsini icra edən Con Bass istefa veriblər.
Qəzetə açıqlama verən işdən çıxarılmış diplomatlardan biri bildirib ki, Tramp komandası məsələyə peşəkar yanaşıb və istefa tələbinin yeni prezidentin şəxsi motivləri ilə bağlı olmadığını aydın şəkildə göstərib.
