ABŞ Prezidenti Donald Tramp öz qeyri-kommersiya layihələrinin, o cümlədən Ağ Evdə bal zalının tikintisinin maliyyələşdirilməsi üçün ölkənin ən iri şirkətlərindən 800 milyon dollardan (təxminən 1 milyard 360 milyon manat) çox ianə cəlb edib.
Oxu.Az xəbər verir ki, bu barədə "The Wall Street Journal" nəşri məlumat yayıb.
Məlumata görə, vəsaitlərin toplanmasını "Trump Media" şirkətinin direktorlar şurasının üzvü Meredit O`Rurk həyata keçirir.
Nəşr qeyd edib ki, ən böyük donorlar arasında "SoftBank", "Apple", "Microsoft", "Amazon" və "Meta" şirkətləri yer alır.
Bildirilir ki, "SoftBank" Trampın prezident kitabxanasının yaradılmasına 50 milyon dollardan artıq, "Apple" isə Ağ Evdə bal zalının inşasına təqribən 25 milyon dollar vəsait köçürüb. Bununla yanaşı, "Microsoft" və "Amazon" təqribən 15 milyon dollar dəyərində maliyyə dəstəyi göstəriblər. Əlavə olaraq, "Meta" korporasiyası da dövlət başçısının təşəbbüslərinə on milyonlarla dollar vəsait ayırıb.
