Aİ Macarıstanın Avropa Sülh Fondunda qalan 6.6 milyard avro vəsaitin blokunu açmasına razılıq verdiyini təsdiqləyib və bu pulu Ukraynaya hərbi tədarük edən Avropa ölkələrinə kompensasiya kimi vermək niyyətindədir.
Oxu.Az xəbər verir ki, bu barədə Avropa İttifaqının (Aİ) diplomatik xidmətinin rəhbəri Kaya Kallas Kiprdə Aİ müdafiə nazirlərinin qeyri-rəsmi görüşündə bildirib.
"İndi yeni Macarıstan hökumətimiz var, bu o deməkdir ki, biz irəliləyirik və Avropa Sülh Fondundan 6.6 milyard avronu blokdan çıxarırıq. Bu gün həm də bu vəsaitdən necə istifadə edəcəyimizi müzakirə edəcəyik. İlkin ideya yükün ədalətli bölüşdürülməsi üçün Aİ ölkələrinə hərbi tədarükləri kompensasiya etmək idi", - deyə o bildirib.
Kallas vurğulayıb ki, Aİ-nin diplomatik xidməti bu pulun bölüşdürülməsi üçün iki layihə hazırlayıb: biri Ukraynaya ən çox silah tədarük edən Aİ ölkələrinə kompensasiya ödəmək məqsədi daşıyır, ikincisi isə pulun təchizat üçün kompensasiya və Kiyevə yeni çatdırılmalar arasında bölünməsini nəzərdə tutur.
Ukraynanın bu pulun bir hissəsinə iddia edə biləcəyi ilə bağlı sualına Kallas cavab verib ki, Aİ bütün tərəflərin maraqlarını nəzərə almağa çalışacaq, amma "heç kim 100% almayacaq".
O, həmçinin xatırladıb ki, "Ukrayna 90 milyard avroluq maliyyələşdirmənin ilk tranşından iyun ayının əvvəlində istifadə edə biləcək", lakin 6.6 milyard avro və Avropa Sülh Fondu ilə bağlı "müzakirələrin hələ də davam etdiyi" bildirilib.
Söhbət Macarıstanın 2023-cü ildən Avropa Sülh Fondunda blokladığı puldan gedir. Peter Madyar hökuməti daha əvvəl bu vəsaitin Ukrayna münaqişəsində istifadəsinə qoyulan vetonu götürdüyünü bildirmişdi.
