Araşdırmaya görə, Avropa İttifaqının səkkiz ölkəsində miqrantların ali təhsil göstəricisi yerli əhalidən daha yüksəkdir.
Oxu.Az ausnews.de-yə istinadən xəbər verir ki, bu nəticə Berlin "Rockwool Foundation" İnstitutunun apardığı araşdırmada ortaya çıxıb.
Tədqiqat 25-64 yaş arası əhali qrupunu əhatə edib. 2017-2025-ci illər arasında ali təhsilli insanların payı bütün qruplarda artıb: Aİ ölkələrindən gələn miqrantlarda 29.4 faizdən 36 faizə, Aİ-dən kənardan gələnlərdə 26 faizdən 32.6 faizə, yerli əhali arasında isə 30.3 faizdən 37.7 faizə yüksəlib.
Araşdırma göstərir ki, İrlandiya, Lüksemburq, Danimarka, Estoniya, Latviya, Malta, Portuqaliya və Çexiya kimi ölkələrdə miqrantlar arasında ali təhsilli şəxslərin payı yerli əhalidən daha yüksəkdir.
Mütəxəssislər qeyd edirlər ki, bu fərqlər ölkədən ölkəyə dəyişir və ümumi "vahid təhsil fərqi" modeli mövcud deyil.
Xüsusilə, İrlandiya nümunə kimi göstərilir: burada həm yerli əhali, həm də Aİ-dən gələn miqrantlar arasında ali təhsil səviyyəsi 55 faizə çatır, Aİ-dən kənar miqrantlarda isə bu göstərici 71 faizə yaxındır.
Araşdırmaya görə, nəticələr yalnız miqrantların kimliyi ilə deyil, ölkələrin tətbiq etdiyi immiqrasiya siyasəti və yüksək ixtisaslı kadrların cəlb olunması ilə də bağlıdır.
