Avropa İttifaqının (Aİ) Tbilisidəki səfiri Pavel Herçinski Gürcüstanın Xarici İşlər Nazirliyinə çağırılıb. Buna səbəb onun Gürcüstan hakimiyyətinin siyasətini çox sərt tənqid etməsidir.
Oxu.Az xəbər verir ki, bu barədə məlumat nazirliyin saytında dərc olunub.
"Xarici işlər naziri Maka Boçorişvili səfirlə görüşdə vurğulayıb ki, Brüsselin Gürcüstana qarşı hazırkı siyasəti, rəsmi Tbilisi ilə bağlı atılan addımlar və verilən bəyanatlar tərəflər arasında etimadı sarsıdır və tərəfdaşlığa xələl gətirir", - deyə açıqlamada qeyd edilib:
"Təəssüf ki, Brüsselin hərəkətləri yalnız Gürcüstan cəmiyyətini daha da qütbləşdirmək və radikal gündəmi təşviq etmək istiqamətində atılan addımlar kimi qəbul edilə bilər".
Nazir qeyd edib ki, Gürcüstan hökuməti konstruktiv dialoqa hazır olduğunu ardıcıl olaraq ifadə edib və Avropa İttifaqından ədalətli və hörmətli münasibət gözləyir.
Xatırladaq ki, bundan əvvəl Herçinski mətbuat nümayəndələrinə bildirib ki, Avropa İttifaqı gürcü xalqının zorakılığa, vətəndaş müharibəsinə, yoxsulluğa, korrupsiyaya və qaranlıq dövrə qayıtmasına imkan verməməlidir.
