Almaniya Polisi beynəlxalq tərəfdaşların dəstəyi ilə uşaqlara qarşı seksual zorakılıq videolarının yerləşdirildiyi "KidFlix" adlı ən böyük platformanı aşkarlayaraq aradan qaldırıb.
Bu barədə Oxu.Az "CBS News" telekanalına istinadla xəbər verir.
"Biz 91 mindən çox videodan və 79 həbsdən bəhs edirik. "KidFlix" qapalı striminq servisinin bağlanması son illərdə, hətta bütün tarix ərzində uşaq pornoqrafiyasına ən ciddi zərbələrdən biri oldu" , - deyə Bavariya polis rəisinin müavini Qvido Limmer vurğulayıb.
Əməliyyat bu il martın 10-dan 23-dək 38 ölkənin iştirakı ilə keçirilib. Əməliyyat zamanı server aradan qaldırılıb, amma saytın administratorları hələ müəyyən edilməyib.
İstintaqın məlumatına əsasən, "KidFlix" gizli şəbəkəsi 2022-ci ildən mövcud olub. Orada onlayn videoya baxmaq, eləcə də onları yükləmək mümkün idi. Bu müddət ərzində 1,8 milyon yaxın insan platformada qeydiyyatdan keçib.
