Almaniya Ukraynaya süni intellektə malik minlərlə dron-kamikadze göndərəcək

Almaniya Ukrayna üçün 6 min müasir "HX-2" dron-kamikadzenin tədarükü elan edib.

Oxu.Az-ın BİLD-in "Telegram" kanalına istinadən verdiyi xəbərə görə, bu barədə Almaniyanın hərbi texnologiyalar üzrə ixtisaslaşmış "Helsing" istehsalçı şirkətindən məlumat verilib.

Şirkətdən bildirildiyinə görə, bu pilotsuz təyyarələr süni intellektlə təchiz olunub və artilleriyanı, zirehli texnikanı və idarəetmə məntəqələrini vura bilir.

Məlumata görə, "HX-2" 100 kilometrə qədər uçuş məsafəsinə və 220 km/saat maksimal sürətə malik dron-kamikadzedir. O, nəinki düşmənin radioelektron müharibə sistemlərinə qarşı durmaq gücünə malikdir, hətta çətin hava şəraitində belə müstəqil şəkildə hədəfi tapa bilir. Üstəlik, dron operatorun müdaxiləsi olmadan hücumun son mərhələsini müstəqil şəkildə həyata keçirmək iqtidarındadır.

Tədarük bir neçə yüz milyon avro dəyərində qiymətləndirilir ki, bu da Ukraynaya 3 milyard avroluq yardım paketinə daxildir.

Müqavilənin yerinə yetirilməsi üçün "Helsing" Almaniyada yeni zavod açıb ki, burada ayda 1000 dron istehsal ediləcək.

"Müasir texnologiyalar düşmənin say üstünlüyünü kompensasiya edə bilər. NATO bundan düzgün nəticə çıxarmalıdır", - deyə şirkətin baş direktoru Qundbert Şerf qeyd edib.