İtaliyanın Alp dağlarında bir qrup xizəkçi qar uçqunu altında qalıb. Hadisə anı şahidlər tərəfindən lentə alınıb.
Oxu.Az xəbər verir, bu barədə Britaniyanın “The Independent” nəşri məlumat verib.
Hadisə İtaliyanın Kurmayor kurortu yaxınlığında baş verib. Foto və videolarda böyük bir qar kütləsinin dik yamacdan xizəkçilərə doğru sürüşdüyü görünür.
İlk başlarda xizəkçilər buna heç bir əhəmiyyət vermirlər, bəzi şəxslər isə birbaşa böyük uçquna doğru xizək sürürlər. Lakin uçqun düşməzdən əvvəl bir neçə dəqiqə ərzində çoxları çarəsiz şəkildə özlərini xilas etməyə çalışırlar. Onlardan hər hansı birinin xəsarət alıb-almadığı məlum deyil.
Qeyd edilir ki, bu, son bir həftə ərzində Avropa Alp dağlarında baş verən uçqunlar seriyasından sonuncusudur.
