Avropa Komissiyası Rusiya enerji daşıyıcılarından imtina planını təqdim etdi

Avropa Komissiyası (AK) çərşənbə günü Rusiya enerji daşıyıcılarının idxalının dayandırılması üzrə "yol xəritəsi" layihəsini təqdim edib.

Oxu.Az "İnterfaks"a istinadən xəbər verir ki, AK-nın üzvü Dan Yorgensen Strasburqda keçirilən mətbuat konfransında bildirib ki, növbəti ay komissiyaya qanunvericilik təklifləri təqdim ediləcək.

AK-nın "yol xəritəsi" Rusiya neftinin, qazının və nüvə enerjisinin Aİ bazarlarından mərhələli, təhlükəsiz və uyğunlaşdırılmış şəkildə çıxarılmasını nəzərdə tutur.

Sənəddə qeyd olunur ki, tədbirlər enerji təchizatının təhlükəsizliyini qoruyaraq, eyni zamanda, qiymətlərə və bazarlara təsiri məhdudlaşdırmaq üçün hazırlanıb.

Brüsseldə bildirilib ki, 2030-cu ilə qədər Aİ-nin 100 milyard kubmetrə qədər təbii qazı əvəz etməsi gözlənilir. Bu isə 2027-ci ilə qədər tələbin 40-50 milyard kubmetr azalması deməkdir. Eyni zamanda, 2028-ci ilə qədər mayeləşdirilmiş qaz (SPQ) güclərinin təxminən 200 milyard kubmetr artacağı gözlənilir ki, bu da Aİ-nin hazırkı Rusiya qazı idxalından beş dəfə çoxdur.