Avropa "sivilizasiya intiharı"nın astanasındadır: ABŞ-nin vitse-prezidentindən xəbərdarlıq

"Avropa ölkələri sərhədlərini nəzarətdə saxlaya bilməyərək və vətəndaşların söz azadlığını məhdudlaşdıraraq "sivilizasiya intiharı törətmək" riski ilə üzləşiblər".

Oxu.Az-ın məlumatına görə, bu barədə ABŞ-nin vitse-prezidenti Cey Di Vens "Fox News" telekanalına müsahibəsində bildirib.

Onun sözlərinə görə, Avropa indi öz tarixinin ən ciddi böhranlarından birini yaşayır.

"Nəzarətsiz miqrant axını və hakimiyyətin bu prosesi səmərəli idarə etmək bacarığının olmaması və ya istəksizliyi Avropa sivilizasiyasının mövcudluğunu təhlükə altına qoyur", - deyə o bildirib.

Vitse-prezident vurğulayıb ki, Avropa ölkələrinin miqrasiya böhranına qarşı mübarizə cəhdləri düzgün istiqamətdə atılan addımdır. Lakin onun sözlərinə görə, eyni zamanda, nəzarətsiz miqrasiyaya qarşı etiraz edən vətəndaşların söz azadlığı məhdudlaşdırılır.

Vens qeyd edib ki, məhz belə etiraz əhvali-ruhiyyəsi Donald Trampın ABŞ prezidenti seçilməsinə, həmçinin miqrasiya siyasətinin sərtləşdirilməsini dəstəkləyən bir sıra Avropa liderlərinin populyarlığının artmasına səbəb olub.

Onun sözlərinə görə, açıq sərhədlər siyasəti və vətəndaşların hüquqlarının məhdudlaşdırılması Avropa ölkələri üçün ciddi problemə çevrilir.