ABŞ “Bitlz” kimi tanınan iki İŞİD terrorçusunu Suriyadan çıxarıb.
Oxu.Az-ın xəbərinə görə, bu barədə ABŞ Prezidenti Donald Tramp özünün “Twitter” hesabında yazıb.
O bildirib ki, İŞİD-çilərin çıxarılması Türkiyənin Suriyada başladığı hərbi əməliyyatlarla əlaqədardır.
D.Tramp əlavə edib ki, həmin İŞİD-çilər ABŞ-ın nəzarətində olan daha təhlükəsiz yerə aparılıb.
Qeyd edək ki, Türkiyə ötən gündən etibarən Suriyanın şimalında PKK/YPG və İŞİD terrorçularına qarşı “Barış pınarı” adlı hərbi əməliyyatlara başlayıb.
Xatırladaq ki, ötən ilin fevralında Suriyada İŞİD terrorçu qruplaşmasının iki britaniyalı üzvü – 34 yaşlı Aleksanda Koti və 29 yaşlı Əl Şəfi Əl-Şeyx kürd döyüşçüləri tərəfindən ələ keçirilib.
Bu şəxslər İŞİD-in “işgəncə aparatının” azadlıqda olan sonuncu üzvləri idi.
Koti və Əl-Şeyxin də daxil olduğu Londondan olan cəllad dördlüyünə qeyri-rəsmi olaraq İŞİD-in “Bitlz” qrupu adı verilmişdi. “İşgəncə aparatının” rəhbəri Məhəmməd Emvazi 2015-ci ildə Suriyada aviazərbə nəticəsində həlak olub.
İŞİD təbliğat videolarının əksəriyyətində danışan Emvazi girovların başını kəsməzdən əvvəl Qərb hökumətlərinə təhdid dolu ismarıclar göndərirdi.
Qruplaşmanın digər üzvü Eyn Devis isə 2015-ci ildə İstanbulda saxlanılıb.
“Barış pınarı” Trampı iki İŞİD-çini Suriyadan çıxarmağa vadar etdi
Aqşin Kərimov
Rəylər